Eit godt døme på kortreist utnytting av skogen

Medan det generelt er ein lang veg å gå til berekraftig utnytting av skogressursane i Rogaland, viste Tore Hundseid Birkeland at det går an. Inne i den store produksjonshallen til bonden og næringsutviklaren er eit majestetisk trebygg i ferd med å ta form.

Det enorme bygget med ei grunnflate på 1.300 kvadratmeter skal få solide tømmerstokkar til reisverk og plank av lerk til kledning. All trematerial er henta frå skog i nærområdet og barka på hogstplass, og når alt er tilpassa skal alt fraktast til Suldal der det skal leva vidare som ridehall.

— Det er første gong eg har brukt barka stokkar rett frå skogen. Tømmeret er hogge nede i dalen her, så det må vel vera klimavenleg og lokalt, seier Tore Hundseid Birkeland og fortel om byggeprosjektet han er i ferd med å utvikla.