Drøs om kommuneplanen sin samfunnsdel stod på programmet då Etne kommune inviterte bygdefolk til ope møte på Skakke. Kvelden starta med informasjon om sektorar og tenester presentert av konstituert kommunedirektør Åsmund Sekse, kommunalsjefane Hilde Selland Winterthun i Helse og omsorg, Eileen Selland i Utvikling og drift og Mona Sævik i Oppvekst og kultur. I tillegg fekk dei frammøtte møta rådgjevar utvikling, Kristine Ebne.
Etter ein kort kaffipause med pizzaservering var det bygdefolket sin tur til å dela sine tankar om framtida. Her blei alt frå tilflytting og arbeidsplassar til klima, naturmangfald og støvproblem lufta i plenum.
Vigdis Madsen etterlyste mellom anna fleire arbeidsplassar og fleire bustader, og meinte tilgang på arbeid og ein stad å bu var heilt avgjerande for å få folk til å flytta til bygda.
