Dar kjem dampen»
Ein del enkeltpersonar og grupperingar ser det som verdfullt å føra gamle båtar av ulike typar tilbake til tidlegare tiders stordom, og gjera dei sjødyktige igjen. Kva resultat tidkrevjande restaureringsarbeid har gitt, er no tilgjengeleg i bokform.
Båtkjennaren og entusiasten Harald Sætre har samla 61 veteranbåtar frå Rogaland, Hordaland og Sogn og Fjordane mellom bokpermane. Forfattaren deler fartøya inn i kategoriar — til saman er det fem slike — og han gir ein detaljert presentasjon av kvar enkelt båt, i tekst og bilete. Vidare gjer han grundig greie for restaurerings- og oppussingsarbeidet som er utført.
Boka inneheld mykje informasjon, til dømes mange båtnamn, personnamn og geografiske namn. Men Sætre fortel med ein smittande entusiasme, og han har ei stor kunnskapskjelde å ausa av. Dermed blir det liv over framstillinga.
Det er forvitneleg å lesa om alle dei som legg ned hundrevis, ja, kanskje tusenvis av arbeidstimar, gjerne ulønna, for å få ein gammal båt tilbakeført til original stand, eller tilnærma original.
