Bygda kan få miljøgate

— Å sikre ei betre trafikkløysing er viktig for fylket, då dette er ein fylkesveg som fører til ferje, sa fungerande kommunalsjef Eileen Selland for bygd og samfunn under samlinga Frukost, folk og føretak på Skånevik Fjordhotel torsdag.

Ho opplyste at kommunen har arbeidd for å få ei miljøgate i Skånevik inn i regionplanen i fleire år. Før nyttår deltok ho i eit møte med Vestland fylkeskommune, der ho fekk høyre om forprosjektet. Forprosjektet er blitt innlemma i områdeplanen for Skånevik.

For forsamlinga delte Selland informasjon om prosjektet og viste det fram på kart. Miljøgata er tenkt å ende om lag ved krysset til hotellet. Den første planlagde fasen i prosjektet er bygging av eit fortau frå omsorgsenteret og til Prestavegen.