Leiar Bjørn Gimming i Norges Bondelag.
Arkivfoto: Heiko Junge / NTB / NPK
Bondelaget: – Matproduksjon er beredskap
Norges Bondelag krev at norsk matproduksjon må sikrast og styrkjast med tanke på beredskap og rekruttering for framtida.
– Vi kan ikkje lene oss på globale forsyningslinjer i ei tid med krig, klimaendringar og geopolitisk uro. Å produsere meir mat i Noreg handlar ikkje berre om næringsutvikling, det er sjølve grunnmuren i den nasjonale beredskapen vår, seier Bjørn Gimming, leiar i Norges Bondelag.
Bondelaget meiner at trygg matforsyning krev stabile rammevilkår, føreseieleg inntekt og verkemiddel som gjer det lønsamt å produsere mat over heile landet, også i Nord-Noreg.
– For å gjere bondeyrket attraktivt for ungdom, må inntektene og sosiale vilkår vere på linje med samfunnet elles. Bøndene i dag møter både marknadskrav, klimakrav og beredskapsansvar. Då må også inntektene og velferdsordningane følgje etter, seier Gimming i ei pressemelding.
