Kommunalsjef Åsmund Andersen Sekse (t.v), kommunedirektør Filippo Ballarin og ordførar Mette Heidi Bergsvåg Ekrheim måtte tre frå då varslingssaka skulle behandlast.
Foto: Grethe Hopland Ravn
Brannberedskap
Både Karlsen og Ekrheim inhabile i varslingssak
I handsaminga av bekymringsvarselet som brannsjef Finn Ulvund har sendt til Etne kommune, røysta formannskapet tysdag at både ordførar Mette Heidi Bergsvåg Ekrheim (Sp) og formannskapsmedlem Kenneth Karlsen (Frp) er inhabile i saka.
Brannsjef Finn Ulvund sende for nokre veker sidan ei bekymringsmelding til Etne kommune der både kommunalsjef Åsmund Sekse, kommunedirektør Filippo Ballarin og ordførar i Etne, Mette Heidi Bergsvåg Ekrheim (Sp) var nemnd.
Tysdag var varslingssaka oppe i Etne formannskap, og først og fremst måtte formannskapet avgjera kor vidt ordføraren var inhabil i å behandla saka. Sidan saka handlar om ei varsling mot kommunalsjef og kommunedirektør der også ordføraren er nemnt, er heile administrasjonen inhabile i å behandla varslingssaka.
Etne kommune har henta inn ei juridisk vurdering i forhold til ordføraren sin habilitet, og juristen har svart at Bergsvåg Ekrheim er inhabil i behandlinga av varselet. I følgje kommunelova paragraf 11-10 gjeld forvaltningslovas kapittel 2 om inhabilitet ved behandlinga av saker i folkevalde organ, med dei særreglane som kjem fram av paragraf 11-10. Ordføraren sin habilitet blir vurdert etter heimel i forvaltningslova paragraf 6.
