Autostore treng mange nye hjernar

Hodneland, som kjem frå Os kommune i bergensområdet, har dei siste åra studert kybernetikk og robotikk ved NTNU i Trondheim. Etter ferdig mastergrad i fjor bar det frå Trøndelag til Vindafjord for ein sommarjobb hjå robotbedrifta AutoStore, og det blei det snarleg fast jobb av. Til vanleg jobbar han med programmering av såkalla firmware» (fornorska til fastvare»), den grunnleggande programvara på kretskorta til den skinnegåande roboten som er sentral for AutoStore-lagringssystemet. Som kjent blei dette i si tid utvikla i Nedre Vats, og der er det i stadig utvikling.

— Eg fekk først kjennskap til AutoStore då eg trefte representantar for bedrifta på stand under ein karrieredag på universitetet i Trondheim. Eg blei fanga av plakaten dei hadde oppe, og hadde undervegs i utdanninga kome fram til at det aktuelle feltet var noko eg gjerne ville inn i. Dermed søkte eg i same drag både sommarjobb og fast stilling, fortel Hodneland.

Territoriet var særs opent og gunstig for 27-åringen i fjor, i kraft av at AutoStore i aller høgste grad er i vekst- og rekrutteringsmodus, og at ingen av dei andre sommarvikarane var ferdige med utdanninga det året. Utteljinga kom, og på kort tid hadde han i fjor haust skrive kontrakt og funne seg leigebustad på Knapphus. Framgangsmåten med både sommarjobb og ordinær jobbsøknad hjå den same bedrifta er det altså all grunn til å sjå fornøgd tilbake på. Å først ha kandidatar inne i sommarjobb ser nok både arbeidssøkar og bedrift fordelar med, anten det er i Åmsosen eller andre stader i konsernet.