Turistane er hyppig framme med kamera, når dei nærmar seg Langfoss i Åkrafjorden. Zoë Longstaff (t.v.), Jane Selwyn, Lindsey Lunch syt for at dei har fotominne frå turen.
Foto: Anita Haugland
Alle» vil oppleve fjorden ute på dekk
Cruisebåtturistane Zoë Longstaff, Lindsey Lunch og Jane Selwyn frå Storbritannia fyller dagane i Noreg med ulikt program. Når dei får tilbod om båttur i Åkrafjorden, vil alle det same.
Sol og varme pregar vêret, når Grannar streifar innom den nye turistbåten, Langfoss, i Åkrafjorden. Turistane som kjem om bord denne dagen, er utstyrte med lette klede og fotoapparat i veskene. Den nye båten har plass til 99 passasjerar innandørs, men dekket utanfor er meir populært. Zoë Longstaff, Lindsey Lunch og Jane Selwyn frå Newark i Storbritannia har teke plass på øvste dekk, heilt framme ved rekkverket.
— Barna våre har gått på same skule, så me kjenner kvarandre frå før, fortel Lindsey Lunch.
Ein annan fellesnemnar for dei tre damene, er at dei er cruisebåtturistar som opplever Noreg denne sommaren.
