Med utgangspunkt i garden sin på Vatne i Nedre Vats har Ingrid Prytz Ohm lagt ned ein enorm innsats for utvikling av hunderasen Welsh Corgi Cardigan verda over. Oppdrettarprisen for 2018 er eit prov på det.
Foto: Torleif Heggebø
Ærespris etter årelang innsats som oppdrettarar
Kennel All Trade i Nedre Vats vart tildelt Norsk Kenneklubb sin oppdrettarpris for 2018 under Norsk vinnarutstilling på Lillestrøm i november. Berre éin rogalandskennel har tidlegare fått denne prisen.
Ingrid Prytz Ohm (49), odelsjente på Vatne i Nedre Vats, er meir enn gjennomsnittet interessert i, og opptatt av hund. Det har ho vore så lenge ho kan hugse, og i meir enn eit kvart århundre har ho via mykje av tida si på oppdrett av fleire hunderasar.
— Som sauebonde var det naturleg å arbeide med gjetarhund nummer éin, Border Collie, men då eg flytta saman med mannen min, så kjøpte me ein Welsh Corgi Cardigan som vår første felles hund, fortel Prytz Ohm.
Interessa for denne hunderasen fekk ho under studiane sine i England.
