— 68 norske vegtunnelar oppfyller ikkje minstekravet

Reglane om tunneltryggleik byrja å gjelde i desember 2006, og eksisterande tunnelar skulle vore oppgradert innan utgangen av april i fjor.

Tilsynet Esa har no sendt Noreg ei såkalla grunngitt fråsegn om saka. Noreg har tre månader på seg til å svare.

— Vedtaket vårt er ei oppmoding til Noreg om å oppfylle tryggingskrava for vegtunnelar til beste for trafikantane, seier Esa-president Bente Angell-Hansen i ei pressemelding.

Trass i at arbeidet med å oppgradere tunnelane er i gang, har regjeringa antyda at det vil ta fleire år før alle oppfyller minstekravet til tryggleik.

Eitt av måla med minstekravet er å hindre hendingar som kan setje liv i fare. Esa meiner derfor at regjeringa bør prioritere tryggleiken til trafikantane og framskunde oppgraderingsarbeidet.

Den grunngitte fråsegna er andre trinn i Esas formelle prosedyre ved traktatbrot. Tilsynet kan deretter velje å ta saka til Efta-domstolen.