Folk i kø for å teste seg på Adamstuen i Oslo nyleg.
Foto: Stian Lysberg Solum / NTB / NPK
653 nye koronasmitta registrert siste døgn
NPK-NTB: Det siste døgnet er det registrert 653 koronasmitta i Noreg. Det er 412 færre enn same dag førre veke.
Dei siste sju dagane er det i snitt registrert 1.268 koronasmitta per dag.
Tilsvarande snitt for sju dagar sidan låg på 1.460, så trenden er fallande.
Fredag var 116 koronapasientar innlagde på sjukehus. Det var tolv fleire enn dagen før. Talet blir ikkje oppdatert i helga.
35 av pasientane ligg på intensivavdeling, og blant dei er 17 på respirator. Det er éin færre på intensiv og éin færre på respirator enn dagen før, ifølgje Helsedirektoratets oversikt.
Ved midnatt natt til måndag var det utført 7,4 millionar koronatestar her i landet sidan februar i fjor.
I alt har 176.142 personar testa positivt.
Til no har 3.957.401 personar fått første dose av koronavaksinen, og 3.430.587 personar har fått andre dose.
Til saman er 827 koronasmitta personar døde i Noreg sidan mars 2020, viser førebelse tal. Om pasientane har døydd av eller med covid-19, er ikkje alltid mogleg å slå fast.
58,5 prosent av alle døde har fylt 80 år. I aldersgruppa under 50 år er det meldt om 18 dødsfall i Noreg.
Same trend i Oslo
Det er registrert 195 nye koronasmitta i Oslo siste døgn, ifølgje oversikta til kommunen. Det er 161 færre enn same dag førre veke og 99 færre enn laurdag.
Dei siste to vekene har det i snitt vorte registrert 434 smitta per dag.
Smittetala er høgast i Grorud bydel. Her er det eit smittetrykk på 1.231 smitta per 100.000 innbyggjarar dei siste to vekene. Deretter følgjer Søndre Nordstrand og Alna bydel med høvesvis 1.196 og 1.032.
