Vi ønskjer langsiktig tryggleik for Skakkesenteret

Kommunen ønskjer eigarskap i Skakkesenteret, fordi vi meiner det vil sikre Skakke som eit kultur- og idrettstilbod i Etne.

I Haugesunds Avis 7. august tek leiaren for generalforsamlinga i Sparebankstiftinga, Asbjørn Moe, til orde for at Etne kommune bør tre ut som eigar av Skakkesenteret. Vi er grunnleggjande usamde og meiner kommunalt eigarskap er den beste løysinga.

Vi ønskjer å sikre ei berekraftig drift og eit levande tilbod for heile lokalsamfunnet. For kommunen og innbyggjarane våre meiner vi at vårt eigarskap vil gje meir tryggleik og føreseielegheit enn det ei leigeavtale vil gjere.

Skakkesenteret har lenge stått i ein krevjande økonomisk situasjon. Kommunen har vurdert fleire alternativ, men kommunestyret har valt løysinga vi meiner gjev best og mest lokal kontroll. Difor er det vedteke at kommunen skal overta lånet til Skakke SA, seksjonere ut idrettshallen og drifte han vidare.

Sparebankstiftinga tilbyr å sletta 30 millionar kroner av gjelda, men mot at kommunen reduserer eigardelen markant. Det er eit betydeleg bidrag, men det er òg eit oppkjøp – ikkje ei gåve slik det vert hevda.

Som minoritetseigar mistar kommunen styringsretten over eit bygg som har stor verdi for lokalsamfunnet. Vi meiner bygget høyrer til kommunen og innbyggjarane, og det er grunnen til at vi ønskjer å behalda eit betydeleg eigarskap for å sikre lokal påverknad og stabil drift.

Det vert sådd tvil om den juridiske kompetansen kommunen har knytt til seg. Det har vore tale om å endre selskapsform, og i den samanhengen har kommunen ønskt ekstern kompetanse på selskapsrett – og det har vi henta inn frå leiande ekspertar på området.

Våre analysar viser at det over tid er både tryggare og meir kostnadseffektivt for kommunen å eige hallen enn å leige han tilbake. Ein leigemodell vil svekkje føreseielegheita og gjere tilgangen for idretten, kulturlivet og frivilligheita avhengig av eksterne og kommersielle prioriteringar.

Spørsmålet om skattehandsaming av gåver kunne med fordel vore avklart gjennom ei bindande førehandsuttale frå Skatteetaten. Det er likevel tilbydaren av midlane – Sparebankstiftinga – som må ta initiativ til ei slik førespurnad.

Vi anerkjenner viljen Sparebankstiftinga har til å bidra, og vi ønskjer ein konstruktiv dialog. Men Skakkesenteret er meir enn eit bygg. Det er kommunen si viktigaste kulturinstitusjon – og ho høyrer til innbyggjarane i Etne.

Mette Heidi Bergsvåg Ekrheim, ordførar
Åsmund Andersen Sekse, konstituert kommunedirektør