Sommarkyrkja i Ølen!

Det var som å gå inn i ein lys sommardag då me fekk koma inn i Ølen kyrkje i novembermørkret sist veke. Ikkje berre var det menneska me møtte og det som skjedde der, som varmt baud oss velkomen. Det var som vindaugo og vegger, søyler og lys let oss kjenna at her er det plass og varme.

Og altartavla – var det slik den var før?

Det er ei glede å gratulera Ølen kyrkjelyd med feiring av den 150 år gamle kyrkja. Og med ein fantastisk innsats for å fornya det som for mange har blitt opplevd som eit noko dystert kyrkjerom, slik det blei måla straks før krigen braut ut i 1940. Det er ein viktig føresetnad at Vindafjord kommune løyvde 1,2 millionar til innvendig måling – for første gong på over 80 år. Men dugnadsinnsatsen har vore formidabel, og utan den hadde ein berre kome eit stykke på veg.