Skakkesaka og arbeidsmåtane til Sparebankstiftinga

Sparebankstiftinga får stryk» stod det i overskrifta til Grannar sin artikkel om informasjonsmøtet om Skakkesaka. Det er dessverre ei ganske presis oppsummering. Innhaldet i møtet skal eg ikkje skriva så mykje om – les heller artikkelen i Grannar. Derimot er det grunn til å seia noko om KORLEIS Sparebankstiftinga jobbar.

Etter stiftinga sin presentasjon av saka, såg ting ryddig og fornuftig ut. Men – så braka det laus og mange hadde kritiske innlegg til Sparebankstiftinga si handtering av saka. Det kom fram meir og meir episodar om arbeidsmåtar som fekk mange til å stussa på kva stiftinga held på med. Det mest graverande var måten leiinga i stiftinga hadde jobba inn» det nye alternativ 2 i forhold til Etne IL. Rett tenesteveg vil sjølvsagt vera å starta med å informera leiaren i Etne IL om forslaget og ta prosessen vidare derifrå. Av frykt for at han kanskje ikkje ville vera einig, informerte stiftinga istadenfor nokre (ikkje alle) av gruppeleiarane i EIL og ba om skriftleg teieerklæring. Slik dolka dei leiaren i EIL i ryggen og takla han utover sidelinja.

Dette er overraskande uprofesjonelt, udemokratisk og direkte uforskamma åtferd overfor ein leiar som har ofra mykje av fritida si for at barn og unge skal ha ei positiv og meiningsfull fritid. Leiarane i stiftinga prøvde fyrst å forklara kvifor dei hadde gått fram slik, men bomma stygt og vikla seg inn i sitt eige garn. Etter hard kritikk frå fleire om dette, var det positivt at styreleiar la seg flat og vil be leiaren i Etne IL om orsaking. Langt meir bekymringsfullt var det at dagleg leiar i stiftinga syntest dette var ein vanleg og grei måte å behandla folk og lag på. Det lovar ikkje godt.

Utover i debatten kom det også fram (frå ordføraren) at Etne kommune ikkje var inkludert/informert om innhaldet i alternativ 2. Når eit styremedlem i Skakke også fortel at styret i Skakke ikkje er informert/involvert i prosessen, er det noko som er både heilt feil og udemokratisk i måten prosessane til Sparebankstiftinga blir gjort.

Stiftinga forvaltar mine og dine pengar – verdiar skapt av kundar i Etne Sparebank gjennom 160 år. Det må stiftinga visa respekt for og vera audmjuke for. Møtet på måndag viser at Sparebankstiftinga er på ein arena fjernt frå bygdefolket.

Det må ha vore tungt å få så tydeleg og krass kritikk frå fleire, men stiftinga har seg sjølv å takka. Det var likevel eit viktig møte for å få lufta ut. Sparebankstiftinga er ein fantastisk ressurs for Etne – og her kan me få til store ting. Då må dagleg leiar, styret og generalforsamlinga visa betring og endring i prosesskompetanse, samarbeidsvilje og demokratisk drift av stiftinga. Sparebankstiftinga må vera ein open organisasjon. Inntrykket idag er at det er ein lukka avdeling der få blir invitert inn. Eg oppmodar alle involverte i stiftinga til å ta ei skikkeleg evaluering og sjå på korleis dei skal jobba framover. Her må det endring til viss leiinga vil ha tillit frå folk.

Den viktigaste og beste samarbeidspartnaren stiftinga kan ha, er kommunen. Saman kan dei verkeleg få til store ting. Eg oppmodar Sparebankstiftinga om å ta imot invitasjonen frå ordføraren om å ta ein runde til ilag og få til ei løysing. Det betyr å legga prestisje til sides – at stiftinga trekk tilbake saka på det ekstraordinære årsmøtet i Etne IL onsdag og vinn tid . Det er alle tent med.

Både kommunestyret, Skakke og Sparebankstiftinga er vårt. Alle vil det beste for Skakke , så lytt til folket, ta ein liten timeout og set dykk ned rundt bordet med kommunen for å finna den beste løysinga for Skakke. Med å trekka saka frå møtet onsdag kan Sparebankstiftinga også visa at dei tek signala frå bygdefolket på alvor, og starta arbeidet med å styrka ein pr idag ganske tynnslitt tillit. Viss ikkje det skjer, oppmodar eg årsmøtet i Etne IL om å utsetta saka.

Morten Odeen