Raudt står samla: Snøggbåten må tilbake til Ølen og Utbjoa

Frå 1. juli mista innbyggjarane i Ølen og Utbjoa snøggbåtanløpet sitt. Det har fått store konsekvensar for kvardagen til studentar, arbeidstakarar, familiar og folk med særskilde behov. Mange har fått timevis med ekstra reisetid, høgare kostnader – og for somme har dette endra heile livssituasjonen.

Vi i Raudt har lese og lytta til dei sterke historiene frå innbyggjarane som har vorte råka. I e-postar og innbyggjarinitiativ har det kome ei rekkje gode og viktige spørsmål: Er det gjort reelle samfunnsøkonomiske vurderingar før vedtaket? Har ein rekna på konsekvensane for skulegang, arbeidspendling og tilflytting? Eller blei tilbodet kutta berre for å spare pengar – utan å ta høgd for kva det faktisk kostar samfunnet på sikt?

Dersom slike vurderingar ikkje er ein del av grunnlaget, er vedtaket ikkje godt nok forankra. Dette handlar om å kunne bu og jobba i distrikta. Når ein legg ned eit slikt tilbod utan å ta inn over seg dei reelle følgjene, bygg ein ned grunnlaget for levande lokalsamfunn, det kan ikkje Raudt vere med på.

Kollektivtrafikk over den vedlikehaldsfrie sjøvegen kan vre ein viktig del av eit framtidsretta, grønt og distriktsvennleg transportsystem – viss vi vil det. Vi i Raudt har foreslått konkrete kutt i politikargodtgjersler – fordi vi meiner det er viktigare å prioritere gode tenester til innbyggjarane enn å bruke millionar på honorar i ulike styre og utval. I Rogaland fann vi 800 000 kroner som kunne sikra sambandet, utan at dette fekk fleirtal og i Vestland pressa vi på for at saka skal behandlast på nytt. Fylkesutvalet har no fått fullmakt til å gå i dialog med Rogaland for å få på plass eit spleiselag og få båtrutene tilbake.

Det finst gode moglegheiter for å styrke sambandet, mellom anna med betre korrespondansar, justerte rutetider og ei meir offensiv satsing på turisme. Men det krev at rutene først blir tilbakeførte.

Vi i Raudt kjem til å kjempe for at anløpa til Ølen og Utbjoa blir gjeninnførte i budsjettet for 2026. Vi støttar innbyggjarane i begge fylke – og forventar at resten av dei politiske partia no lyttar til folket dei er valde til å representere og legg pengane på bordet.

Naomi Wessel, fylkestingsrepresentant og 2. kandidat til stortinget frå Rogaland – Raudt
Jeanette Syversen, fylkestingsrepresentant i Vestland og 3. kandidat til stortinget frå Hordaland – Raudt