Betydninga av velkomstklassen i Vindafjord kommune

Dette er eit lesarinnlegg. Innhaldet gir uttrykk for skribenten sine eigne meiningar og haldningar.

I kommunedirektøren sitt budsjettframlegg er det føreslått nedskjeringar i fleire etatar, noko som vil påverka kvaliteten på utdanninga i Vindafjord kommune. Utdanningsforbundet ønskjer å uttrykkja sine bekymringar, særleg med omsyn til aukande krav og forventningar i skulesystemet, og den potensielle nedlegginga av velkomstklassen ved skulen i Ølen. 

I barnehage og skule har krava og forventningane auka betydeleg. Budsjett-tala for desse einingane er allereie urealistiske, og samsvarar ikkje med finansieringa som er tilgjengeleg. Lærarane står overfor ein stadig meir krevjande kvardag, der tida til undervisning blir redusert på grunn av ei rekkje utfordringar blant barn og unge i dagens samfunn.