Gåve til bygda, ikkje maktspel

Etter det opne møtet på måndag har Sparebankstiftinga Etne fått mange meldingar frå bygdefolk, lag og foreiningar som støttar vårt forslag og engasjement for løysing for Skakke. Dessverre, fordi saka er blitt så betent, tør ikkje mange å vere synlege. At nokon ropar høgast, betyr ikkje at dei har rett eller representerer fleirtalet. Det gjer oss enno meir overtydde om at stiftinga må halde fram.

Me har i utgangspunktet prøvd å unngå ordskifte fram og tilbake gjennom Grannar, men me ser oss no nøydde til å svare ut nokon påstandar.

Det er fleire grove misforståingar rundt stiftingas engasjement i Skakke. La oss klarne opp:

• Lag og foreiningar skal eige idrettshallen, ikkje stiftinga.
• Dette er ei gåve, ikkje eit oppkjøp.
• For å kunne gje ei gåve må ein følgje klare reglar, derfor krav om eigarstruktur.
• Stiftinga har bede om tausheitserklæringar for å beskytte konkret utkast til løysinga, ikkje for å manipulere prosessen.

I vår naive tilnærming trudde me det skulle vera ei enkel sak å bli kvitt 30 millionar til ei god sak i bygda vår. Dessverre har vår oppleving i all dialog med kommunen vore at det ikkje er interesse for gåva. Frå dag ein har me opplevd å vera eit hår i suppa for kommunedirektøren sine ambisjonar om å ta over heile Skakke. Ord som “oppkjøp” blir slengt rundt veldig bevisst fordi det er lettare å takke nei til eit oppkjøp enn det er å takke nei til ei gåve.

Lag og foreiningar er òg eigarar i Skakke. Stiftinga, som skal leggje til rette for nettopp idrett og kultur i bygda, kan ikkje sjå på at det som er bygd opp gjennom frivilligheita over fleire tiår skal gå til kommunen for ein sum som ikkje stemmer med verdien.

På generalforsamlinga i Sparebankstiftinga vart det samrøystes vedteke å først sondere med leiarane for dei fire største gruppene i idrettslaget. Viste det seg å vere interesse, skulle me gå vidare til dialog med heile styret. Var det negativ respons, var det heller ikkje noko poeng å trekkje fram forslaget vidare.

Me bad om tausheitserklæringar for å skjerme konkrete utkast til løysing – ikkje for å styre eller manipulere prosessen. Når mange partar er involverte, trengst det tryggleik rundt dokumenta, slik at ikkje halvferdige forslag blir spreidde og mistolka. Målet var å sikre ein ryddig prosess, ikkje å halde nokon utanfor.

Samstundes forstår me at dette skapte mistenksamheit – særleg i eit allereie svartmåla bilde av stiftinga. Dette tek me lærdom av.

Fakta er at Skakke SA, som driv idrettshallen og kulturbygget i Etne, har over tid hatt svak økonomi. Tala viser at vidare drift ikkje er berekraftig utan nye løysingar.

Sparebankstiftinga sitt forslag til løysing er å opprette eit nytt ideelt aksjeselskap – eigd av idrettslag og foreiningar som brukar Skakke. Dette selskapet får ei gåve frå stiftinga og kan så by på idrettshallen – og på den måten ta ansvar for idrettshallen og dermed òg framtida til Skakke. Det inneber at drifta skjer i regi av frivillige, med mogleg leige til kommune/skule og idrettslag (som før i hallen). Overskotet frå drifta av idrettshallen skal gå tilbake til Skakke.

Stiftinga meiner at lag og foreiningar skal eige hallen for å halde verdiane hjå nettopp frivilligheita. I tillegg skjermar det Skakke frå ein stadig meir krevjande kommuneøkonomi, og på same måte kommunen frå kostnader til drift av Skakke. Sist, men ikkje minst, gjer det at hallen kan ta imot gåver frå stiftinga òg i framtida. Det er ikkje mogleg med kommunalt eige.

Denne modellen er i tråd med krav til “allmennyttig bruk” for at stiftinga skal kunne gi ei gåve. Allmennyttig bruk betyr ikkje private verksemder og heller ikkje offentleg eigde verksemder (Etne kommune, Bondelaget, Coop Extra, Arbeiderpartiet og Høgre). Dette er ikkje noko vi i stiftinga meiner, det er reglar frå Finansdepartementet som vi må følgje (og som vi har dobbeltsjekka med Selmer, landets fremste rådgjevarar for bankar og sparebankstiftingar).

Alle lag og foreiningar er velkomne til å eige i det nye ideelle AS. Einaste krav frå Kulturdepartementet er at minst 51 % av eigarane må vera såkalla spelemiddel-berettiga», altså dei må kunne søkje spelemidlar. I tillegg synest me at det er god selskapsstyring at ingen eig meir enn 40 prosent. Ei slik grense hindrar at enkeltlag får for mykje kontroll og makt over fellesskapet.

Difor foreslår me følgande, men me er opne for innspel:

Me føreslår at eigarskapen i Skakkehallen AS skal fordelast mellom fleire lag og organisasjonar i bygda. Etter forslaget eig Etne IL 40 prosent, UL Fram 36 prosent, Etne Karateklubb 11 prosent og Etne Lions 3 prosent. Vidare føreslår me at Etne Jeger- og Fiskerforening eig 3 prosent, Etne Musikklag 4 prosent, Etne Mållag 3 prosent, medan Etne Skulekorps ikkje skal ha eigardelar.

Sparebankstiftinga vil gjerne vere ein del av løysinga og ei berekraftig framtid for Skakke, men det er opp til bygda å avgjere.

Asbjørn Moe, leiar av generalforsamlinga

Frode S. Robberstad, styreleiar

Rune Ramsvik, dagleg leiar