Eit kommunalt oppkjøp utan garantiar

Ordføraren og kommunedirektøren ønskjer å sikre langsiktig tryggleik» for Skakkesenteret gjennom kommunalt eigarskap.

Etne FrP meiner dette vitnar om eit gammaldags og lite framtidsretta tankegong, og ikkje minst ein lite bærekraftig måte å bruke innbyggjarane sine pengar på!

Å ta over store lån og driftsansvar i håp om tryggleik» er ikkje utan risiko.

Det er ikkje eit kommunalt ansvar å eige og drive kulturbygg. Det er derimot eit ansvar å leggje til rette for aktivitet og frivillig innsats.

Den enorme økonomiske risikoen som kommunen no påtek seg, vil i praksis binde opp framtidige budsjettrammer og svekke moglegheita for å gi andre, sårt tiltrengde tenester.

Som til dømes helse og omsorg som me veit me må bruka mykje meir penger på framover.

Fremskrittspartiet meiner prinsipielt at kommunen ikkje skal eige og drive meir enn det som er absolutt naudsynt. Me må heller gjere rom for private, frivillige og ideelle aktørar.

I dette tilfellet har me ein flott stifting som faktisk tilbyr å slette heile 30 millionar kroner av gjelda, og ta økonomisk risiko – det burde vere utgangspunktet for ei fredsløysing – ikkje krig.

At ordføraren og kommunedirektøren omtalar dette som eit oppkjøp» og ikkje ei gåve, er ein språkleg spagat i mine auger.

For folk flest er dette eit kraftfullt bidrag til lokalsamfunnet, ikkje ein kommersiell transaksjon.

Etne FrP fryktar at kommunen no gjer seg til husvert» på ein måte som på sikt vil krevje meir (vertfall ikkje mindre!) kommunal innsats og pengar.

Når dei same folka seier at det er kosta på leiande ekspertar» på selskapsrett, må vi spørje: Er det slik me vil bruke ressursane våre på – på advokathonorar og gjeldsovertaking?

Kva er ein redd for?

Det finst ei betre løysing: La kommunen vere ein trygg samarbeidspartnar for Skakkesenteret, men ikkje hovudeigar. Gje rom for at lag, organisasjonar og private kan forsøkja noko nytt.

Det kan jo gå godt toss alt? Gode avtalar, langsiktig leige og økonomisk støtte til aktivitet, ikkje eigarskap! Dette gir både tryggleik og handlefrihet.

For Etne FrP er det viktigare å bruke fellesskapets pengar på tenester til folk flest, heller enn kommunale oppkjøp.

Kenneth Lyng Karlsen