Bortkasta stemmer – og ein løyndom?

Mange meiner det er bortkasta stemmer å stemma på eit av dei mindre partia. Dei får ikkje inn nokon likevel, vert det sagt. Dette er sjølvsagt feil. Det vert også sagt at alle stemmer tèl. Dette gjeld sjølvsagt berre dei stemmene som ligg i valurna, og som dermed vert talde når valet er sluttført.

Dei einaste stemmene som er bortkasta, er dei stemmene som ikkje vert brukte fordi folk sit heime og ikkje stiller opp og stemmer.

Så kast ikkje bort stemma di – møt opp, bruk stemmeretten – og stem gjerne på Konservativt. Det er ikkje bortkasta

Somme trur at dei meir etablerte partia bortimot abonnerer» på faste stemmer. Sjølv om det gjerne kan sjå slik ut, er det likevel feil. Heile poenget med å gjennomføra eit val, er at folket skal kunna velja, ja dei skal til og med kunna velja noko anna enn det dei valde for fire år sidan. Dersom ein ynskjer ei forandring i politikken, gjev det lite meining å stemma likt som ein gjorde sist.

Så kjem den store løyndommen:

Dagen før det vert opna for førehandsrøysting stiller alle partia med null stemmer. Dei stemmene som eit parti fekk for fire år sidan er makulerte, eller i det minste arkiverte – utan verdi for valet dette året. Heller ikkje stemmene frå alle meiningsmålingane har nokon som helst verdi for det faktiske valresultatet.

Alle partia må få nye stemmer dette året. Ja, det kan delvis vera frå dei same veljarane, men stemmesetlane må vera 2025-utgåva.

Vis at du kjenner denne løyndomen – møt fram og stem noko anna!

Stem Konservativt!

Børge Løype , Skjoldavik

Konservativt Vindafjord