930 av oss kan mista moglegheita til å sletta studiegjeld

Ved eit mogleg regjeringsskifte står ei viktig ordning for fall – ei ordning som kan påverka framtida til hundrevis av unge og nyetablerte i våre kommunar. Heile 290 personar i Etne og 640 personar i Vindafjord kan mista retten til å få sletta deler av studielånet sitt dersom Høgre og Frp kjem til makta.

Senterpartiet i regjering har innført ordninga med gjeldssletting for dei som flytter til og jobbar i distrikta – ein målretta politikk for å sikra busetnad, rekruttering og vekst i mindre kommunar. Dette har vore ei reell gulrot for unge med høgare utdanning til å satsa på bygdene, og nokon har vald å etablera seg nettopp her på grunn av denne moglegheita.

Eit regjeringsskifte til ei borgarleg regjering – som tidlegare har kutta denne ordninga – vil truleg bety at denne viktige økonomiske støtta forsvinna. For oss i Etne og Vindafjord betyr det at 930 personar som i dag har krav på gjeldssletting, kan stå igjen utan denne retten.

Dette er ikkje berre eit spørsmål om økonomi – det handlar om distriktsutvikling, kompetansebygging, og rettferd. Kvifor skal det vera mindre attraktivt å bidra til samfunnsutvikling i distrikta enn i storbyane?

Me treng ein politikk som verdset dei som vel å bu og arbeida her. La oss ikkje mista denne moglegheita. La oss stå saman for rettferdig behandling og framtidstru i distrikta.