Sport
Strålande innsats av unge bilførarar
For første gong fekk unge bilførarar i alderen 11 til 15 år stilla til start i klassen Bilcross NextGen under Vestlandsmeisterskapet på motorbanen i Vikedal. Det blei ei oppleving dei seint vil gløyma.
— Det var kjekt og spennande å køyra løp. Me køyrer i klassen Bilcross NextGen og skal køyra tre omgangar i dag, seier 11 år gamle Aksel Leifsen frå Vikedal, Hannah Flatebø (13) frå Etne og Sigve Leifsen (14) frå Vikedal, medan dei gjer seg klare til runde nummer to på motorbanen i Vikedal.
Saman med seks andre unge førarar frå NMK Vikedal, NMK Egersund og NMK Bergen debuterte dei i klassen Bilcross NestGen under sesongopninga i Vikedal. At dei koste seg bak rattet, er det ingen tvil om, og dei er fast bestemte på å satsa vidare på favorittsporten.
— Bilcross er kjekt, og me vil satsa på sporten. Me har våre eigne bilar og har vore med og bygd bilane sjølve. Det er kjekt å skru, seier dei og smiler nøgd.
