Rina er tilbake i Grannar – nå på andre sida av bordet

Rina Aspmo er Grannar sin nye journalist, og når ho nå tar plass i redaksjonen, er det ikkje heilt ukjent terreng ho går inn i. Ho kjenner både arbeidsplassen og kollegaene frå før. 29-åringen har nemleg vore tilsett i marknads- og produksjonsavdelinga i lokalavisa i fire år, fram til august i fjor. Då jobba ho både med annonsesal og grafisk arbeid. I august byta ho beite og takka ja til ei stilling som HR- og rekrutteringsansvarleg i annan bedrift, men er nå tilbake i Grannar. Denne gongen på den redaksjonelle sida.

— Eg kjenner jo Grannar og har trivst godt med gjengen her, så nå gler eg meg til ny arbeidskvardag og nye oppgåver, seier Aspmo.

Interessa for journalistikk kjem heller ikkje ut av ingenting. Ho har utdanning innan medie- og kommunikasjon, først frå Stord og seinare frå Etne. Mens ho gjekk på skule på Stord, var ho i praksis i Kvinnheringen i fleire månadar. Der jobba ho tett med Tomas Bruvik, som den gongen var redaktør i avisa. I dag er Bruvik generalsekretær i Landslaget for lokalaviser (LLA).