Saman på fotballskule i veka — møttest til duell i helga

Denne veka har FK Haugesund-spelarane Hanne Bjelland (19) og Solfrid Hetleflåt Bråthen og Avaldsnes-spelar Kristine Hustveit Nybru (16) vore på TINE Fotballskule i Ølen og inspirert cirka 110 fotballspelarar i alderen 9 til 14 år. Sandeidbuen Bjelland hadde keepertrening med unge keepertalent, etnebu Hetleflåt Bråthen hadde ein stasjon med ballføring, mens Hustveit Nybru frå Vikedal leia ei drible-, veggspel- og spurteøving.

Søndag var det alvor då jentene møttest til kamp på Skeie i 2.divisjon avdeling 4 i oppgjeret Avaldsnes 2-FKH. Hustveit Nybru, som har fått tre kampar for førstelaget i Toppserien denne sesongen, var med i startelvaren for Avaldsnes 2, mens Bjelland og Hetleflåt Bråthen starta for FKH. I tillegg satt Thea Knutsen frå Bjoa på benken for FKH.

Scoringar frå Marion Mannes Haugland, Viktoria Sørensen og Ulrikke Eliassen sørga for at heimelaget vann 3-2. Emma Schwennicke og Anna Ferkingstad scora FKH sine mål.