Ny bane gir nye moglegheiter

— Å få ein ny bane er skikkeleg bra, og det er veldig kjekt å spela på han. Eg ser for meg å vera her kvar dag, seier Rakel Helle Tendal (12).

Mina Langhelle Åsheim (10) tenkjer det same. Tysdag kveld var dei ute og spelte uorganisert med kvarandre. Begge spelar fotball aktivt, og Helle Tendal var ein del av laget som spelte den første kampen på banen.

På høg tid

Initiativtakar Leif Bjørnar Larsen håpar banen vil bli brukt så mykje som mogleg, både av idrettslaget sine lag og andre.

— Det kjennest ganske fint. Deileg, eigentleg. Det er på høg tid å få dette på plass, seier Larsen, som saman med Torleiv Sydnes har vore drivande i arbeidet med prosjektet på vegner av Skånevik IL.

Den nye kunstgrasbanen ligg like ved den gamle grasbanen og Skånevik kultur- og idrettshall. Sidan våren 2021 har prosjektet vore under planlegging, og det siste året har det blitt lagt ned mange timar med dugnadsarbeid frå lokale eldsjeler. Den siste tida har folk kopla lys, gjort klart til ballfangarnett og sikra anlegget før opning.

— Det er heilt fantstisk å ha banen klar, seier Sydnes.

Frå vatn-dam til heilårsbane

Med ein eldre grasbane og berre ein grusbane som alternativ i bygda, har Skånevik IL lenge kjempa med utfordrande banetilhøve. Grasbanen har takla det vestlandske regnvêret dårleg, og kampar har måtta flyttast eller avlysast. Terminlistene til laga til Skånevik IL har ofte måtta komprimerast, med alle heimekampane på eit par månadar rundt sommaren.

— Me har hatt eit kjempeproblem med å avvikle kampar i starten og slutten av sesongen. Å byggje ein kunstgrasbane tvang seg fram til slutt, seier Larsen.

Med flaumlys og moderne dekke blir det ein heilt ny kvardag for både spelarar, trenarar og foreldre. Larsen fortel at kunstgrasbanen vil gjere det mogleg å spele fotball året rundt. I 2025 stiller Skånevik IL med fire aldersbestemte lag i tillegg til seniorlaget, og behovet for stabile forhold er stort.

4. mai blei kunstgraset klarert til bruk for trening og leik.

Løft for bygda

Den nye banen vil ikkje berre komme idrettslaget til gode. Også skulen og barnehagen vil få tilgang til anlegget i skuletida, og utanom organisert aktivitet blir det opna for eigentrening og leik for barn og ungdommar i bygda.

— Me håpar banen blir brukt av flest mogleg, fortel Larsen.

Det er ifølgje han ikkje mange plassar ein kjem til i 2025, der ein ikkje har kunstgras, så han er glad for at også Skånevik no har dette på plass. Larsen peikar også på at det å ha ein moderne kunstgrasbane gir bygda eit ekstra løft, saman med mykje anna bra i bygda.

Prosjektet har hatt ein prislapp på over ti millionar kroner pluss moms, og er no fullfinansiert. Det har blitt mogleg gjennom støtte frå Etne kommune – som har stått for grunnarbeidet – samt spelemidlar og gåver frå SØK-stiftinga, Mohn-fondet, Sparebanken Vest, Mowi, Skånevik Bygdeutviklingslag, Tungesvik Bygg og fleire lokale bedrifter.

Opning og jubileum

Sjølv om banen no er teken i bruk, er ikkje alt heilt klart. Det blir ikkje offisiell opning før i løpet av mai eller juni, og då skal det feirast skikkeleg at Skånevik endeleg har fått kunstgrasbane.

— Me vil gjerne ha alt på plass før me markerer opninga, men det kjem, seier Larsen.

Måndag 12. mai blei den første kampen på banen spelt, då Skånevik sitt J10/11-lag møtte Etne. Larsen fortel at seniorlaget kan velje som dei skal spele sin neste heimekamp i 7. divisjon mot Nedstrand 20. mai på kunstgrasbanen eller grasbanen.

Skånevik Idrettslag vart stifta 27. november 1935 og fyller dermed 90 år i 2025. Dei har i dag cirka 160–170 aktive medlemmar som deltek i aktivitetane fotball, handball, trim og volleyball. I tillegg har idrettslaget ei skigruppe som driftar skiløyper i fjella ovanfor bygda vår når det er nok snø til det, og ei banenemnd som held stadion i god stand.