Sport
Natur og løype gav løpsglede
Laurdag tok over hundre store og små fatt på den elleve kilometer lange løypa under årets Langs Åkrafjorden. Den årvisse tradisjonen i august samla i år både erfarne mosjonistar og dei som berre ville nyte turen langs fjorden.
— Det er flott utsikt og ei fin løype, sa deltakar Harald Sværen.
Det var sett av to timar til trimklassen, der deltakarane kunne gå eller jogge i sitt eige tempo. Her var det om lag 40 påmelde.
Annonse
Når alle var komne i mål, var det duka for mosjonsløpet. Totalt var 59 påmelde – 14 kvinner og 45 menn. Dette er ein stor oppgang frå i fjor, då talet var 32. Då var det òg berre tre påmelde i kvinneklassen.
På herresida vart det siger til stordabuen Tom Erling Kårbø frå Stord IL, som vann på tida 34.32. Bak han følgde Reidar Austrheim frå Vikedal, som representerte Jølster IL, med 35.39, medan tredjeplassen gjekk til Nils Haktor Bua frå Spirit Friidrettsklubb på 37.50.
I kvinneklassen vart det triumf for Eli Indbjo Gjerde frå Haugesund Triatlonklubb på 45.37. Mariann Vevatne frå Etne, som representerte Frisk Treningssenter, tok andreplassen med 46.38, medan arrangørklubben IF Klypetussen fekk ein løpar på pallen med Anne Alice Runner på 51.35.
Etter målgangen for hovudløpet var det klart for barneløpet, der dei yngste fekk prøve seg på ei 700 meter lang løype. Medalje venta alle i mål. I barneklassen var det totalt 25 påmelde.
Annonse
— Blir fort ein tur tilbake neste år
Tre av dei som deltok i mosjonsløpet, var kompisgjengen Hans Sævereid, Harald Sværen og Vegard Grytte. Dei har den siste tida fått ei felles interesse for å springe.
Dei valde ut Langs Åkrafjorden som eit av dei første løpa dei meldte seg på i fellesskap. Etter løpet går det ikkje lange tida før dei skal vidare til neste løp.
— Om to veker skal me til Budapest for å springe halvmaraton, sa Hans Sævereid.
Kompisgjengen har tidlegare spelt fotball, og såg seg nøydde til å finne ei ny interesse som let dei halde kondisen oppe. Dei er samde om at den nye hobbyen gav meirsmak.
— Det har vore veldig gøy. Det er flott utsikt og ei fin løype. Det er nokon eldsjeler som er med og stelle i stand, så det er kult at dei får det til, sa Harald Sværen.
Annonse
—Neste år blir det fort ein tur tilbake her, og då skal me prøve å slå tida me fekk i dag, la Sævereid til.
— Gjort ein kjempejobb
— Det har gått utruleg fint. Komiteen har gjort ein kjempejobb.
Slik konkluderte deltakar og aktiv bidragsytar Gisle Sellevold etter den 22. utgåva av Langs Åkrafjorden. Han har vore med sidan starten, men presiserer at han ikkje har noko formell rolle.
Årets komité bestod av Olav Samland, Elin Udstuen, Torbjørn Samland og Magne Berge.
— Folk sit og skryt endå av arrangementet her på Åkrafjordtunet, sa Gisle Sellevold rundt ein time etter at premiane var delte ut.
Annonse
Sellevold peikar på at fleire lokale løp rundt om har sett seg nøydde til å stoppe opp av ulike grunnar. Han meiner det er fleire årsaker til at Langs Åkrafjorden har klart å halde på så lenge – mellom anna at naturomgivnadane er flotte, og at det ligg eit sterkt lokalt initiativ bak.
