Lokaloppgjer i OBOS-cupen

5. divisjonslaga Vats/Skjoldar og Etne møttest i 2. runde av OBOS-cupen måndag kveld i Vats. Før kampen var det ei verdig markering med eit stille minutt, i høve det tragiske dødsfallet til Tobias Sævareid Tesdal(17) frå Etne.

Etne har gjort det best denne sesongen, og levde opp til favorittstempelet med å setje inn to mål i den første omgangen. Først fekk Kristoffer Grønstad pirka inn 0-1 etter klabb og babb i feltet. Etter halvtimen utnytta Thomas Lien ein grov tabbe i Vats/Skjoldar-forsvaret, og sette inn 0-2. Heimelaget hadde ikkje mykje å by på, og stillinga stod seg inn til pause.

Andre omgang vart ein heller langdryg affære, med mange byter, og lite finspel. Nærmast skåring kom Bjørnar Aastvedt med ein susar i tverrliggaren frå langt hald. For heimelaget vart det mykje nesten, og skåringa som kunne skapt liv i kampen, kom aldri. Dermed er det Etne som går vidare til 3. runde i cupen.