Lang tur for å sparka ball

Fotballen opptek mykje av tida til Sara Haugan Helland frå Vikedal. Når ho ikkje er opptatt med lekser og trening på idrettslinja ved Ølen vidaregåande, der ho går første året, er ho å finna på fotballbanen. Tre gonger i veka tek ho den lange turen enten til Tysværvåg eller Kolnes for å trena fotball saman med jentene på damelaget til Falkeid, og i helgene er det som oftast duka for kampar.

Men for den fotballinteresserte 17-åringen er ein god times biltur til og frå trening ikkje noko problem.

— Det tek over éin time kvar veg, men det går bra. Det er som regel mamma som kjører, men av og til reiser eg saman med 17 år gamle Anna Fuglestein frå Vats som spelar på same lag. Me samarbeider om køyringa. Me reiser også ein del i helgene. Då er det kampar og dei er for det meste i Stavanger-området, seier Helland som også av og til spelar kamp midt i veka i tillegg til helgene.