Kan vinne gjæv pris

— Eg er både stolt og audmjuk over nominasjonen, og set stor pris på at nokon har teke seg tid til å nominere meg, seier Nils-Morten Breivik Dahl.

No trenar han Fjordar G14, slik han har gjort sidan dei var fem år gamle. I tillegg er han leiar i Skjoldar IL, og han har òg vore primus motor for Haraldseidvågen Rundt sidan løpet blei teke opp att i 2021.

Kan gi pengar til klubben

Det er Noregs Fotballforbund, Norsk Tipping og Norsk Fotballtrenarforeining som kårar Årets Grasrottrenar. Breivik Dahl er blant elleve nominerte i Rogaland Fotballkrets.

— Det er ei stor inspirasjon vidare. Samstundes er det mange flinke trenarar som brukar mange timar av fritida si på barn og unge i Skjoldar og Fjordar, som òg hadde vore verdige kandidatar til ei nominasjon. Eg håpar sjølvsagt at folk vil gje meg ei stemme, seier Breivik Dahl.

I tillegg til heider og ære vil klubben til vinnaren av Årets Grasrottrenar i kvar krets få 10 000 kroner. Klubben til den som vinn den nasjonale kåringa – og blir Årets Grasrottrenar i fotballen – vil i tillegg få 20 000 kroner, altså totalt 30 000 kroner til klubben som har den nasjonale vinnaren.

Ser heile mennesket

På Noregs Fotballforbund si nettside har kvar nominert fått ein lengre introduksjon. Om Breivik Dahl står det:

Nils Morten er sjølve definisjonen på ein grasrottrenar. I over 13 år har han vore ein bauta i lokalfotballen, med heile åtte år som hovudtrenar for eitt gutelag og fem år for eit anna – alltid som frivillig, og alltid med det same brennande engasjementet for både fotballen og spelarane.

Han ser heile mennesket, ikkje berre spelaren. Han inviterer til grilling, bading og akedagar – og byggjer eit sterkt samhald som varer utanfor bana. Når nokon treng skyss til kamp eller trening, stiller han. Når nokon er skadde, blir dei likevel inkluderte og oppmuntra til å bidra – som ein viktig del av laget.

Treningane hans blir gjennomførte i all slags vêr – og alltid med godt humør. Han er kunnskapsrik og godt trent sjølv, og klarer å matche tempoet til spelarane sine. Med ein tydeleg, men støttande stil, dreg han gutane vidare og får dei til å bli betre – fordi han trur på dei.

Han rettleier, lyttar, oppmuntrar og skaper eit trygt miljø der spelarane veks både som fotballspelarar og menneske. Nils Morten er ein stabil, engasjert og høgt verdsett ressurs for klubben – og ein viktig vaksenperson i liva til mange unge gutar.

Med erfaringa, dedikasjonen og den varme personlegdomen sin er han ein grasrottrenar av sjeldan kaliber – og ein svært verdig kandidat til Årets Grasrottrenar.»