Gav full gass i NM i motocross

Tre utøvarar frå våre bygder var i helga (31 august til 1. september) austover for å delta i Lag-NM i motocross på Elverum. Laget var påmeld av NMK Vikedal som dermed var representert for første gong på dette prestisjestemnet. Laget var og einaste frå vestlandet i år. På Elverum møtte dei 44 lag sett saman av dei beste utøvarane frå resten av landet.

Adrian Vik (17) frå Fitjar var kaptein. Elles på laget var Theodor Reimers (17) frå Bjoa og Mikal Hauso Flesjå (16) frå Nå i Hardanger.

Meisterskapen har innleiande rundar med kvalifisering laurdagen. Der skjer utvalet til finaledagen som er søndagen. Dei lågare finalane, C og D blir køyrt ferdig laurdag.

Laget frå NMK Vikedal henta inn såpass godt med poeng at dei kvalifiserte direkte til B-finalen og var dermed klar for finaledagen. I B-finalane står kampen om ein plass i A-finalen. Laget kom godt ut i starten med Theodor nummer to av grinda. Mikal var nedpå ein tur frå ein god posisjon i startfeltet men tok seg godt inn og alle fullførte godt, noko som er avgjerande i motocross for lag. Men A-finaleplassen var det eit drygt stykke opp til. Kapteinen på laget, Adrian Vik var den i laget som fekk beste plasseringa i B-finalen.

Lagleiar var Per Vidar Flesjå. Han er opphaveleg frå Ølen og har mange år i NMK Vikedal. Dette er eit meisterskap der ein møter dei beste i landet – utan inndeling i dei vanlege kubikk-klassane. Kvalifikasjon til finaledagen var det vi håpa på, men ikkje våga heilt å tru på. No fekk vi det til og det er stort for både laget, klubben sporten i vårt distrikt sa Flesjå etterpå.

Nils Reimers

NMK Vikedal