Full gass i surt haustvêr

Vergudane var ikkje på NMK Vikedal si side når det vart arrangert
klubbmesterskap for crosskart, bilcross, og motocross. Over 80
deltakerar stilte til start. Veret var ufyselig i starten av dagen, men
letta litt ut på ettermiddagen. Dei nyoppsette vandrepokalane for
bilcross og motocross var det Sølve Østbø frå Ølen og Adrian Vik frå
Fitjar som sikra seg eit napp i. Bilcross har hatt vandrepokal tidlegare
år, men den vann Sølve til odel og eige i fjor.

Dei yngste klassane i motocross, 50 og 65 ccm, kjører utan konkurranse,
men det er svært imponerande å sjå korleis dei handterar motorsyklane
under slike krevjande forhold som det var laurdag.

I 85 ccm-klassen var det Johan Kilane (Erfjord) som takla forholda best
og gjekk til topps i klubbmesterskapet. Nærmast han kom Sigve Reimers
Holten Leifsen (Vikedal) og Sindre Aarsbog Berekvam (Suldalsosen).

Adrian Vik (Fitjar) kjørte raskast i 125 ccm-klassen framfor Theodor
Vestbø Reimers (Bjoa) og Mikal Hauso Flesjå (Nå). Det var også desse tre
som gjorde ein flott innsats i lag NM i Elverum i august.

7 år gamle Victoria Tveit-Runge frå Tysværvåg er åleine om å kjøra
Crosskart Mini, men ser ut til å få konkurranse av fleire neste år. To
som kjørte i den klassen tidligare, Daniel Veland Skeie og Endre Stople
Enge, har no kjørt nokre år i Crosskart 85 ccm. Laurdag dominerte Daniel
i dei to første omgongane før Endre akkurat klarte å vinna i tredje
omgong. I finalen var det igjen Endre som var raskast og vann framfor
Daniel.

Vegard Owe (Sandeid), som vann førre løp og NMK Vikedal cup for
bilcross junior, sleit med ein bil som øydela drivakslingar i innleiande
omgongar. Han kom seg likevel til finalen der det vart ein frisk kamp
med dei som var best etter innleiande omgongar, Mathias Leifsen
(Vikedal) og Torstein Steine (Suldal). Den gjekk Vegard seirande ut av
når begge drivakslingane var heile, med Mathias og Torstein på dei neste
plassane.

I bilcross senior hadde heile 34 førerar funne fram grombilen og
stilte til start. Det glatte føret saman med vilje som ikkje stod heilt
i stil med evner og feste førte til ein del snurringar men utan dei
heilt store skadene. I A-finalen skjedde det mykje, med mange snurringar
og nesten-snurringar. Den som akkurat heldt seg innanfor grensene, men
hadde eit par tilfeller heilt på grensa, var Sølve Østbø (Ølen). Han
vann framfor Bjørn Cato Aarekol (Sandeid) og Thomas Hundseid Eikeland
(Vikedal). Sølve tok dermed første napp i den nye vandrepokalen etter at
han vann den forrige i fjor.

Dette var siste løpet for sesongen på Vikedal Motorbane. Det
blir nok litt treningar på lørdagar fram til frosten kjem og klargjering
til neste sesong. Årets sesong har vore svært bra med NM-runden i
rallycross i Vikedal med gode lokale resultater som høgdepunkt for bil
og flott innsats i NM-runden for motocross lag i Elverum for
motocrossgruppa.

NMK Vikedal takkar alle for innsatsen i år og ønskjer alle velkomne
tilbake neste år.

For NMK Vikedal

Svein Erik Østø