Westcon-levert båt alvorleg skadd

Dette skriv bransjenettstaden Kystens Næringsliv. Fisketrålaren Ecofive» blei kåra til Årets skip i 2023. Kystens Næringsliv skriv at leveringa av båten har blitt utsett fleire gonger, men 26. februar i år varsla Ålesund-reiarlaget Bluewild i ei pressemelding at dei endeleg kunne overta den nybygde båten frå skipsverftet Westcon Yards i Ølensvåg.

Skada under testkøyring

Fabrikktrålaren skulle gjennom siste fase med ferdigstilling i Ålesund før testkøyring. Men under testkøyringa i april gjekk det gale. Då mannskapet skulle manøvrera ombordtaksutstyret A-ramma, blei denne kraftig vridd, viser dokument Fiskeribladet har fått innsyn i.

Skipper om bord på Ecofive», Fridtjof Køhn, skreiv 22. april til reiarlaget at skipet måtte returnera til Ålesund etter skaden:

A-rammen skulle kjøres fra øvre til bakre stilling. […] beveget seg lite eller ingenting. […] Begge beina på A-rammen er vridd med betydelige skader. Det er ikke mulig å fortsette fiskeri. Setter kursen mot Ålesund», skreiv Køhn.

Westcon svarar

Kystens Næringsliv har intervjua administrerande direktør hos Westcon Yards, Øystein Matre. Han seier dette om saka:

— Det er veldig uheldig at det skjer skadar på utstyret. Dette utstyret er kjøpt frå ein underleverandør. No må reiarlaget undersøkja om dette er ein konstruksjonsfeil frå denne leverandøren.

— Reiarlaget har ein garantiperiode hos dykk?

— Ja, me har 12 månaders garantiansvar. Så har reiarlaget valt noko utstyr sjølv. Då er det normalt at dette ansvaret blir ført vidare til underleverandør. Me har vore i dialog med reiarlaget om dette.

Matre seier vidare at dersom det er feil på utstyr frå leverandør, kan dette bli ei sak for forsikringsselskapet til reiarlaget. Han ønskjer ikkje å seia kva for underleverandør det gjeld.

— Det er ein fantastisk flott og avansert båt. Me ønskjer reiarlaget all lykke.

— Skaden på skipet oppstod kort tid etter at det blei levert frå Westcon Yards. Meiner de at de har ansvar for skaden som oppstod?

— Me er i ein garantiperiode. Verftet har heilt openbert eit garantiansvar. Meir enn det ønskjer eg ikkje å kommentera.

— Så de har ein dialog med Westcon Yards i samband med utgiftene skaden har ført med seg?

— Det blir heilt sikkert ein diskusjon. Me jobbar med å få oversikt over detaljane i dei undersøkingane me held på med.

Kjenner ikkje årsaka

Reiar i Bluewild, Tore Roaldsnes, seier at dei framleis ikkje kjenner årsaka til skaden.

— Me fekk eit havari som gjorde at me ikkje kunne fiska. Det pågår ein prosess for å kartleggja årsaka til dette, seier han til Fiskeribladet.

To dagar etter havariet søkte reiarlaget Fiskeridirektoratet om å få nytta Ishavet» som leigefartøy, slik at kvotegrunnlaget tildelt Ecofive» kunne bli fiska opp i løpet av året. Fiskeridirektoratet avslo søknaden. Men etter ein klagerunde gav Nærings- og fiskeridepartementet likevel reiarlaget løyve til å bruka Ishavet» som leigefartøy.

[…] bruttotapet til fartøyet per dagutgjør omtrent 750 000 kroner […] Etter en samlet vurdering har Nærings- og fiskeridepartementet kommet til at omfanget av skadene på A-rammen oppfyller vilkårene for bruk av leiefartøy», står det i vedtaket.

Håpar på drift til hausten

Reiar Tore Roaldsnes er open om at skaden på Ecofive» har ført til prøvingar for Bluewild.

— Det er klart at det som skjedde har ført til ei økonomisk belastning for reiarlaget. Men det er noko me handterer.

Han fortel at A-ramma er i ferd med å bli montert på nytt.

— Me måtte laga to nye bein på henne. Reparasjonen er i ferd med å bli gjennomført. Så må ho resertifiserast av kyndig personell.

Roaldsnes håpar at skipet kan vera i gang med ordinært fiskeri i byrjinga av september. Skipet ligg no til kai ved anlegget til Bluewild på Flatholmen i Ålesund. Fram til førre veke var det inne til reparasjon hos Ulstein Verft.