Vindkraftkommunar får pengar til natur og friluft

Pengane skal gå til å fremje friluftsliv og naturmangfald i område med vindkraft, skriv Klima- og miljødepartementet i ei pressemelding.

– Det er viktig at vi gir noko tilbake til dei som er ramma av vindkraft. Arbeidarparti-regjeringa starta denne støtteordninga for å passe på at kommunar med vindkraft skal få noko tilbake som kan brukast direkte til å bevare naturen og styrke friluftslivet, seier klima- og miljøminister Andreas Bjelland Eriksen (Ap).

Han seier at målet er å redusere den samla belastninga på natur og friluftsliv i kommunar som er ramma av vindkraftverk.