Vindturbinar tilhøyrande Haram vindkraftverk på fjellet over Ulla i Møre og Romsdal.
Foto: Halvard Alvik / NTB / NPK
Vindkraftkommunar får pengar til natur og friluft
Som eit plaster på såret til kommunar som har bygd vindkraftanlegg, får kommunar, lag og foreiningar i ti fylke til saman 28 millionar kroner.
Pengane skal gå til å fremje friluftsliv og naturmangfald i område med vindkraft, skriv Klima- og miljødepartementet i ei pressemelding.
– Det er viktig at vi gir noko tilbake til dei som er ramma av vindkraft. Arbeidarparti-regjeringa starta denne støtteordninga for å passe på at kommunar med vindkraft skal få noko tilbake som kan brukast direkte til å bevare naturen og styrke friluftslivet, seier klima- og miljøminister Andreas Bjelland Eriksen (Ap).
Han seier at målet er å redusere den samla belastninga på natur og friluftsliv i kommunar som er ramma av vindkraftverk.
