Biogass
Vil ikkje tilrå strengare føringar for lukt
Tilleggsforslaget for strengare føringar for lukt på Tongane som Framstegspartiet la fram for formannskapet i vår, har fått ein gjennomgang av kommuneadvokatane. Forslaget bør ikkje inn i kommuneplanen sin arealdel, er meldinga.
Etter at Framstegspartiet i Etne la fram eit tilleggsforslag til arealdelen i kommuneplanen i vår, som omhandla strengare føringar for lukt på Tongane industriområde, blei det bestemt at dette var ein sak kommuneadvokatane på Karmøy måtte ta ein kikk på.
BDet var spesielt to punkt formannskapet ville ha svar på: Kan verksemder på Tongane ha krav på erstatning som følgje av strengare føresegner i kommuneplanen sin arealdel som omhandlar lukt? Kan Renevo ha krav på erstatning for starta prosjekteringskostnadar dersom nye føresegner fører til at dei ikkje får etablert seg på ny tomt på Tongane?
Annonse
Tilrår ikkje
Framstegspartiet sitt forslag til ei føresegn som skulle innlemmast i kommuneplanen sin arealdel, handlar om at nye verksemder eller tiltak ikkje kan plasserast slik at dei vil føra til sjenerande lukt for naboar eller omgjevnader i sentrum. Dei ønskjer også at det skal utarbeidast ein reguleringsplan i dei tilfella verknader for miljø- og samfunn ikkje lar seg avklara på kommunenivå. Dei vil også at det i samband med utarbeiding av reguleringsplan kan setjast krav om miljøoppfølgingsprogram. I forhold til desse ønska, vil formannskapet ha vurdert dei juridiske tilhøva ved føresegna.
På bakgrunn av det juridiske notatet frå Karmøyadvokatane kan ikkje administrasjonen tilrå at føresegna som omhandlar strengare føresegner for lukt på Tongane blir inkludert i kommuneplanen sin arealdel slik som Frp la fram ønske om.
Eit alternativ
Annonse
Ut frå det juridiske notatet går det ikkje klart fram av lovverket om kommunen sin heimel gjennom plan- og bygningslova 11-9 strekker seg så langt at kommunen med direkte heimel i lova kan fastsetja bindande miljøkvalitetskrav.
Eit alternativ kan heller vera at det blir utarbeida ei føresegn med heimel i plan- og bygningslova under krav om reguleringsplan, der føresegna blir plassert under kapittelet Næringsområde, og spesifisert for Tongane. Intensjonen med føresegna er at denne skal gjelde for ny verksemd og eventuell utviding av eksisterande verksemd, der tiltaka er av slikt omfang at dei utløyser krav om konsekvensutgreiing og plankrav.
I så tilfelle blir føresegna lagt til andre gongs behandling av kommuneplanen som no ligg på høyring.
Saka kjem opp for formannskapet tysdag 5. september.
