Havvind
Vil ikkje ha grønvasking av fisken si skjebne
For første gong sidan AF Gruppen lanserte planane om utvida bruk av land og sjøareal til produksjon av vindmøller på Raunes i Vats blei saka behandla politisk i formannskapet tysdag. Vatsbu Monica Nesheim (Sp) og fleire var opptatt av at ein ikkje må gløyme fisken i Vats- og Yrkefjorden.
— Det blir viktig å passe på at planen ikkje blir ein slags grønvasking av negative konsekvensar, sa Monica Nesheim (Sp).
Ho eksemplifiserte med eit scenario der det kunne vere kjipt for fisken, men bra for straumen, og understreka at ein må få fram alle konsekvensane og så ta det innover seg.
Annonse
I september 2023 offentleggjorde AF Gruppen at dei vil leggje til rette for produksjon av fundamenter og samanstilling av vindturbinar på sitt anlegg på Raunes i Vats. Tysdag blei planprogrammet for detaljregulering for AF Miljøbase med sjøområde i Vats- og Yrkefjorden einstemmig vedtatt. Planprogrammet blei utarbeidd av Norconsult og har vore på høyring og offentleg ettersyn. I prosessen har det blant anna vore eit folkemøte om planane på Skjold Arena i mars der AF Gruppen og Norconsult måtte svare på stor skepsis.
Vanlegvis er det berre tilsette i administrasjonen og media som tek turen for å følgje med politiske møte, men denne gongen var også karmøybuen Elin Magdalena Korvanen Mæland på plass. Ho delte ut brosjyrar frå Motvind Norge med kritikk mot havvind.
— Eg er her for å informere og høyre, fortalde Korvanen Mæland.
Dei siste åra har ho engasjert seg mot planane om å legge til rette for produksjon av vindmøller til havvindnæringa både på Raunes og Dommersnes Industriområde i Vikebygd. Ho engasjerer seg for Vatsfjorden og Ålfjorden, og fisken i dei.
Annonse
Vil ha alternativ for sjøareal
Temperaturen under formannskapsmøtet var betydeleg lågare enn under folkemøtet i Skjold. Øyvind Valen (Ap) poengterte at eit planprogram berre seier kva som skal gjerast i reguleringsarbeidet.
Planprogram er første steg mot ein reguleringsplan, som også krev ei konsekvensutgreiing. Når planprogrammet er fastsett, skal forslagsstillar utarbeida konsekvensutgreiing på grunnlag av dette og leggje konsekvensutgreiinga til grunn for det vidare arbeidet med reguleringsplanen. I Norconsult sitt planprogram går det fram at følgjande tema skal konsekvensutgreiast: Naturmangfald, vassmiljø, naturressursar (fiskeri, akvakultur og drikkevatn), landskap, støy, luftforureining, klimagassutslepp, friluftsliv og kulturminne og kulturmiljø.
I tillegg skal andre tema bli behandla i eigne rapportar/notat eller i planskildringa. Dette gjeld: geoteknikk og områdestabilitet, transportbehov og trafikk på sjø, trafikk på land, forureina grunn, energibruk/-løysingar, massehandtering, vatn, avløp og overvatn, ankring, nærings- og samfunnsinteresser, bustad, nærmiljø og folkehelse, arkitektonisk og estetisk utforming, volum og høgder, barn og unge og universell utforming.
— Så vidt eg kan sjå er alle innspela som har komme blitt svara ut, sa Valen.
Basert på folkemøtet oppfatta han at det folk er mest opptatt av er kva som skal skje i fjorden. Som følgje av dette fremja han eit forslag til eit tilleggspunkt for at ein skal vere enda tydlegare på korleis sjøarealet skal brukast. Forslaget lyder:
Annonse
Bruken av sjøarealet er eit stort tema i denne reguleringsplanen. I planskildringa, eller i eit eiga notat, skal det difor skildrast korleis sjøarealet skal nyttast ved ulike alternativ for drift på land, inkludert liggetid for installasjonane og talet på installasjonar. Det skal og gjerast greie for bruken av arealet dersom det er liten eller ingen produksjon av vindmøller på landbasen. Dette skal leggjast til grunn for føresegnene i forslaget.»
Mat til framtidige generasjonar
Tilleggspunktet til Valen blei einstemmig vedtatt. Varaordførar Gustav Løge Fosse (KrF) var glad for at det vil bli vurdert korleis fisket vil bli råka i konsekvensutgreiinga.
— Det å forvalte sjø slik at me har mat også i kommande generasjonar er ei uhyre viktig side, sa varaordførarane.
Han understreka Monica Nesheim (Sp) sitt poeng om at havvindsatsinga blir omtala som ei grøn satsing, samtidig som det ikkje nødvendigvis er positivt for alle. Nina Karin Ramsfjell (Sp) framheva viktigheita av medverknad framover.
— Det kan aldri bli nok informasjon til bygda, dei lokale, grunneigarar og alle andre, sa Ramsfjell.
Sidan planområdet omfattar areal både i Vindafjord og Tysvær må planprogrammet og resten av prosessen gå gjennom begge kommunane. Endeleg vedtak om reguleringsplan er venta i 2025.
