Vil ha full konsekvensutgreiing om sjø- og jordkabel
På initiativ frå Etne Venstre stilte stortingsrepresentant Sveinung Rotevatn olje- og energiminister Marte Mjøs Persen (Ap) spørsmål om konsekvensutgreiing av bruk av sjø- og jordkabel reletart til bygginga av kraftlinja Blåfalli-Gismarvik på måndag.
— Me er mange som er svært bekymra over den nye 420kV høgspentlinja som skal byggast i nærområdet vårt i Etne kommune. Store delar av lokalbefolkninga i kommunen fortvilar og er skuffa over Statnett si manglande konsekvensutgreiing for sjø og jordkabel, skriv gruppeleiar i Etne Venstre Kristin Golf i ein e-post til Grannar måndag.
Vil skåne naturen
Annonse
Som følgje av eigen og lokal bekymring har Etne Venstre bedt stortingsrepresentanten sin Rotevatn ta opp saka med olje og energiminister Marte Mjøs Persen. Dette har Rotevatn følgd opp, og i eit skriftleg spørsmål til Mjøs Persen har han skrive:
Vil det bli gjennomført ei full konsekvensutgreiing av bruk av sjø- og jordkabel som alternativ i samband med bygging av ny 420 kV-line frå Blåfalli i Kvinnherad til Gismarvik i Tysvær?»
Rotevatn viser til engasjementet i Etne i sin grunngiving for spørsmålet:
Statnett jobbar med planar om å bygge ei 90 km lang høgspentlinje frå Sunnhordland til Haugalandet. Utbygginga vil kunne få store konsekvensar for natur- og friluftlivsverdiar i området, og særleg i Etne kommune har mange protestert mot planane. Å bygge liner i luftspenn fører til svært synlege inngrep som også kan gå hardt ut over naturen, medan bruk av sjøkabel kan føre til mindre konflikter og færre naturinngrep. Sidan kostnadar ofte vert brukt som argument i slike saker, er det av stor interesse om dei faktiske alternativkostnadane ved bruk av sjø- og jordkabel på delar av strekninga vil bli grundig utgreia i denne saka.»
Annonse
Dette er ikkje første gong olje- og energiministeren må svara om moglegheita for sjøkabel i forbinding med den planlagde utbygginga. I November spurte Helge André Njåstad (Frp) om Mjøs Persen var einig i at sjø- og jordkabel var den beste løysinga for den aktuelle utbygginga, og viste til partikollega og varaordførar i Etne kommune sitt engasjement i saka. Ho svara då at saka var til behandling hos Noregs vassdrags- og energidirektorat (NVE).
Mjøs Persen sitt svar på spørsmålet frå Rotevatn vil komme på Stortinget sine nettsider.
