Vil ha betre arbeidskvardag på hjul

— Eg er litt redd for at næringslivet blir akterutsegla om ein ikkje får fortgang på vegprosjekt, sa fungerande dagleg leiar Morten Helland i Medvind24 Næringshage under bransjemøtet på tinghuset.

Der var Bakka-Solheim og fleire delprosjekt oppe til diskusjon.

Ønsker effektiv kolonnekøyring

Bakgrunnen for besøket og turen til leiar Sigbjørn Gjelsvik (Sp) i transportkomiteen på Stortinget er at det ikkje har blitt tillate å køyre tungbilkolonne over Haukeli. Dette trass i at staten har investert i oppstillingsplassar som kan skilje personbilar og vogntog.

Haugaland Vekst stod bak den arrangerte turen. Dagleg leiar Sigmund Lier fortalde i forkant at Gjelsvik i møte med Haugaland Vekst og Haugalandsrådet hadde tatt initiativ til å få køyre over og sikre seg god og relevant informasjon frå bransjen. Haugaland Vekst ønskte å leggje til rette for at han fekk dette til, slik at han er betre i stand til å føre sak på Stortinget som i alle høve kan sikre eit prøveprosjekt i vinter med eiga tungbilkolonne når uvêret set inn.

— Du får utfordringane inn på ein heilt annan måte av å sitje på, sa Gjelsvik etter turen.

Nor-log-sjåføren Torstein Ramsdal stod for frakta av den tidlegare kommunal- og distriktsministeren. Han synest at dialogen med Gjelsvik var god, og at politikaren verkar å vere ein jordnær og grei kar.

Denne turen kom medan vêret framleis var fint. Under eit stopp nær Håfoss fortalde Ramsdal at han synest det var ein grei tur. Han fortel at å køyre over Haukeli generelt sett kan by på mange utfordringar og er positiv til innføring av tungbilkolonne. Med krav om kjetting under kolonnekøyring, kraftige køyretøy og yrkessjåførar ser han høve til at tungtransporten kan komme seg fram i krevjande forhold.

— Det er viktig for meg at eg kjem fram og kan oppretthalde køyre- og kviletid, så vel som at eg får fram varene, sa Ramsdal.

Han understrekar at vegmyndigheitene må ha høve til å sortere vekk dei store bilane som ikkje har det dei treng for å klare seg i ei kolonne.

Får det til i Hardanger

På vegen møtte Ramsdal og Gjelsvik Vindafjord-ordførar Ole Johan Vierdal (Sp), Etne-ordførar Mette Heidi Bergsvåg Ekrheim (Sp), og dagleg leiar Pål Kårbø i Haukelivegen AS. Dei blei med på møtet i Vindafjord rådhus.

Det gjorde òg fungerande dagleg leiar Morten Helland i Medvind24 Næringshage, stortingsrepresentant Lisa Marie Ness Klungland (Sp), Sveio-ordførar André Mundal Haukås (H) og Jarle Nilsen, som både var der som politisk ressurs frå Karmøy kommune og rådgivar hos Lufthavndrift AS, som driv Haugesund lufthamn.

Eit poeng som gjekk igjen, var at tungbilkolonneordninga fungerer godt over Hardangervidda. Gjelsvik poengterte at oppstillingsplassen på Vågslid er skikkeleg fin. Han stilte seg spørsmål om kvifor ein ikkje skal få til det same over Haukeli som over Hardangervidda og vil følgje saka vidare.

— Å fortelje personbilar at dei ikkje får vere med i ei tungbilkolonne burde vere ein enkel operasjon, sa transportkomitéleiaren.

Ventar Rogfast-auke

Under møtet fekk Gjelsvik òg relevant informasjon om Bakka-Solheim-prosjektet, og Bakka-Mo spesielt. Kårbø og Vierdal viste på kart korleis diverse E134-prosjekt skal gå, og snakka om framdrift og høve til å få dei realisert.

Vierdal fortalde blant anna at det går mot oppstart på gul stripe-prosjektet Ølen-Mørkeli til våren. Over den allereie store trafikkbelastninga på E134 heng den venta effekten av Rogfast, som opnar i 2033. Alle dei frammøtte var tydelege på viktigheita av at ein får framdrift på E134 no, så vel som tiltak som tungbilkolonne som sikrar at varer kjem fram på kort sikt.

Mundal Haukås illustrerte med at ingen har det så travelt som ein daud laks. Bergsvåg Ekrheim var òg tydeleg på at det må bli gang på prosjekta no, av omsyn til anleggsbransjen, som ho fortalde har begynt å permittere folk.

— Dippen me har åtvara mot, er her, sa Etne-ordføraren.

Gjelsvik svara at det er viktig at det er tilstrekkeleg påfyll av nye store og små prosjekt å setje i gang etter kvart som tidlegare prosjekt blir ferdige. Han oppmoda dei lokale kreftene til å vise til Rogfast-effekten når dei skal argumentere for prosjekta.