Vil gje dei unge fleire tilbod

Ølen sanitetslag har fått med seg utfordringsbiletet i Ølen, og inviterte nyleg medlemmene, FAU ved Ølen skule og politiet til eit møte der dei ville diskutera utfordringane og saman sjå om dei kunne finna nokre gode løysingar. Det vart gode diskusjonar, og allereie gode tiltak som finst i Ølen vart lyfta fram.

Ifølgje politiet er ikkje situasjonen i Ølen dramatisk ut frå deira statistikk og tal. Politibetjent Ivar Ødegård påpeikte likevel at det kan vera mørketal. Det kan det vera fleire grunnar til, som at saker ikkje blir meld, at folk trur saka blir lagt bort, eller at folk ikkje ser det som alvorleg nok til å melda.

— Det er viktig å melda saker, på denne måten får politiet tal å forhalda seg til når dei skal prioritera, seier Ødegård. Det er lov å koma innom, senda ein e-post, eller berre ta ein telefon til politiet, fortalde han vidare.