Vil gi bygda eit bustadløft
Gjennom fleire år har Vats i Vekst jobba for å få til tomte- og bustadutvikling i Åmsosen. Nå håpar dei at utbyggjarar vil sjå verdi i å byggje leilegheiter på Stokkasida (austsida) av Vatsfjorden.
— Å få til leilegheiter hadde vore kjempepositivt for Vats som bygd. Det er eit ønske som har lege der i alle år, seier styremedlem Monica Nesheim i Vats i vekst.
Vats i Vekst er ei stifting som har som formål å legga til rette for utvikling og vekst i bygda. Arbeidet skal bidra til å skapa handlingsrom for tomteutvikling og etablering og tilflytting. Styret består i tillegg til Nesheim av Stig Hatteland, Johannes Sjurseike, Sigbjørn Gjellestad og Asbjørn Velde.
Stiftinga har tidlegare vore pådrivarar for eit leilegheitsprosjekt på Knapphus-feltet som er under bygging. Dette prosjektet er det Øyvind Nordtveit som gjekk i gong med. Vidare har desse initiativtakarane saman jobba om å få til ein oppstart av Knapphus 2, som er ei utviding av Knapphusfeltet i dag.
