Vil endre vindkraft-praksis

— Framover vil eg foreslå at me behandlar det første planinitiativet administrativt, slik me gjer med alle andre planinitiativ, sa kommunedirektør Yngve Folven Bergesen under eit formannskapsmøte tysdag.

Det vil bety at kommunen tek imot, gjennomfører eit oppstartsmøte, skriv eit referat og gir ein første tommel opp eller tommel ned, slik som ved alle andre initiativ.

Kommunestyret haldt døra open

Folven Bergesen hadde gjort seg nokre refleksjonar etter prosessen då formannskapet og kommunestyret skulle behandle Eviny si melding om vindkraft på Måkafjellet i Skjold hausten 2024.

— Eg har tenkt litt på korleis me bør behandle den typen meldingar, sa Folven Bergesen.

Vidare viste han til at kommunestyret i oktober 2024 behandla eit innbyggjarinitiativ om vindkraft, der eit fleirtal vedtok at Vindafjord kommune ikkje skal vere prinsipielt imot vindkraft, men skal behandle kvar søknad for seg.

Dei statlege retningslinjene for slike saker seier at det er fire punkt i prosessen der ein kommune får spørsmålet til vurdering: ja eller nei til å sjå nærare på eit tiltak.

Seinare i prosessen

Kommunedirektøren minna om at dei i fjor haust hadde i gang ei sak på det første av dei fire sluttstadia. Eviny sendte ei melding til kommunen, og administrasjonen la i utgangspunktet opp til politisk behandling i desember, men Eviny valde å trekkje meldinga før ho kom så langt.

Folven Bergesen rakk likevel å få ein del spørsmål og kommentarar frå lokalpolitikarane, og han observerte fleire av diskusjonane som gjekk. Noko av det han merka, var at mange gav uttrykk for at søknaden var tynn, med mangel på konsekvensar og innhald, og at ein ikkje visste kva ein sa ja eller nei til.

— Svara på dei spørsmåla var i dei aller fleste tilfelle at det ville vere ein del av prosessen som skal kartleggjast vidare, sa kommunedirektøren.

Viss ein seier ja til planinitiativet, må det gjerast eit planprogram og ei konsekvensutgreiing før ein reguleringsplan eventuelt kan bli vedteken, forklarte Folven Bergesen. Han peika på at i reguleringsplanen kan politikarane setje opp kva tema dei vil ha kartlagt, og få svar på dei.

Framleis mange politiske høve

Som følgje av erfaringane ønskjer kommunedirektøren å behandle planinitiativ om vindkraft på same måte som andre initiativ. Så lenge kommunestyret ikkje har sagt nei til vindkraft på land på eit prinsipielt grunnlag, trur han at den tilnærminga vil få prosessen inn på eit spor som er ryddigare for tiltakshavarar, politikarar og administrasjon.

— Formannskapet får full moglegheit til å be om alle dei konsekvensutgreiingane som ein ønskjer å få gjort på det tidspunktet det er naturleg for initiativtakar å leggje dei fram. Dokke får òg alle moglegheiter til å vurdere konsekvensane, både i vurderinga av om ein skal sende eit forslag til reguleringsplan på høyring, og om ein skal vedta det eller ikkje etter høyringa, sa Folven Bergesen.

Samla sett trur han at å følgje den vanlege praksisen for planinitiativ gir ein ryddigare og meir føreseieleg prosess, både administrativt og politisk. Avslutningsvis poengterte han at det framleis vil vere tre høve der formannskap eller kommunestyret kan seie ja eller nei i prosessen, men då på tidspunkt der dei har eit betre kunnskapsgrunnlag å gjere ei vurdering ut frå.

— Me tenkjer at det er ei meir fornuftig tilnærming, avslutta kommunedirektøren.

Ingen politikarar stilte spørsmål etter orienteringa hans.