— Viktig for Vindafjord

Vindafjord kommune er ein av eigarane i den 5.000 mål store næringsparken i Gismarvik i Tysvær, som kan bli arbeidsplass for tusenvis av menneskje, også frå Vindafjord og Etne, i tiåra som kjem.

— Det er kjempeviktig for regionen at konsesjonen no er på plass. Utan straum hadde me ikkje kome vidare. Det er avgjerande, og det var på høg tid, seier Vierdal.

— Det har vore mindre friksjon i debatten om konsesjonssøknaden i Vindafjord enn i Etne, har du noko forklaring på det?

— Nei, eg trur ikkje eg skal spekulere noko i det. Men industri og næringsutvikling har alltid vore viktig for Vindafjord og me ligg langt framme der, poengterer han.

— I kva grad trur du det blir utpendling frå Etne og Vindafjord til Haugaland Næringspark?

— Haugaland har vore ein felles arbeidsmarknadsregionen i lang tid, og det blir det ikkje mindre av med dette. Mange pendlar i dag til Kårstø, og det er kortare veg hit. Det er berre ein halvtimes køyring for mange i Vindafjord, så dette blir glimrande, seier han.

— Kva betyr dette for Vindafjord som medeigar i Haugaland Næringspark?

— Det er gledeleg for kommunen når me er med som eigarar. Men eg tenkjer mest på heile regionen, som får fleire arbeidsplassar. Det å skape arbeidsplassar er det viktigaste for Vindafjord og dei andre eigarkommunane i regionen, seier han.