Ventar mykje folk og utfordringar med parkering under kongebesøket

Kongebesøket

30. mai kjem kongeparet til Vindafjord

Du kan følgje besøket live på grannar.no

Tips oss om saker me bør skrive om i samband med den store dagen, og del dine bilde med lesarane: tips@grannar.no eller MMS 975 70 789

Foto: Jørgen Gomnæs / Det kongelige hoff

Les alt om kongebesøket her:

Kongebesøket

Det meste er i boks til kongebesøket på torsdag. Programmet er spikra, landgangen som kongen og dronninga skal bruka når dei stig i land ligg klar og ei spesiallaga trapp skal sikra at kongeparet kjem seg trygt på land. Firma til å ta seg av montering av tribune, lys og lyd er leigd inn og sikkerheita er godt ivaretatt med både PST, politi og kongens livgarde klar til innsats.

— Det meste skal vera i rute. Det ser lovande ut, seier ordførar Ole Johan Vierdal og gler seg til det royale besøket.

Les alt om kongebesøket:

Gardisten får opptre på heimebane

Klar for kongeleg feiring

Skal halde tale til kongeparet

Små majestetar i barnehagen

Programmet for kongebesøket

— Eg har helst på dei før og det er fantastiske folk. I 2014 var alle ordførarane og nokre fylkesordførarar på slottet. Me fekk handhelsa på kongen og han heldt tale til oss. Og så fekk eg helsa på han i Ledaalparken i Stavanger i 2015, seier han.

Parkering

Sjølv om det kan dukka opp nokre regndropar på den store dagen ser ikkje ordføraren bort frå at det kan koma fleire tusen menneske til Ølen. Parkering kan bli ein av dei store utfordringane. Vegen ut mot Dreganes vil bli stengt og området ved Ølen senter er reservert publikum. Dermed må folk belaga seg på ein liten spasertur etter at bilen er parkert.

— Det vil ikkje bli parkering på nedsida av E134 og heile senteret blir bilfritt, seier Vierdal og rår folk til å parkera på oppsida av hovudvegen.

— Det er god plass på Nerheim på industrifeltet, men det er litt å gå, seier han.

Personar som ikkje kan gå langt til fots kan bli sleppt av i krysset ved E134. Det gir kort veg ned mot senteret.

Uansett om ein kjem til fots eller i bil er det lurt å vera ute i god tid. Medan publikum ventar på dei prominente gjestene blir det høve til å få med seg ein liten minikonsert med Vikebygd sin store artist.

— Ein bør helst vera på plass rundt klokka 10. Det skal vera ein halvtimes lang minikonsert med Tom Roger Aadland kvart over ti, seier Vierdal.

Tale

Kongeparet nyttar Kongeskipet Norge som fast base under fylkesbesøket i Rogalandskommunane og presis klokka 11 skal kongen og dronninga stiga i land i Ølen og bli møtt av ordførar, kommunedirektør og politisjef. Ordførar Ole Johan Vierdal er også blant talarane denne dagen og har fått ei tilmålt tid på fire minutt til å helsa kongeparet velkomen og prata litt om laust og fast. Det håpar han skal gå av i likaste laget.

— Det blir ein litt lauslegare tone. Eg kjem til å spela litt på dronninga si interesse for å gå i fjellet og kongen si interesse for laksefiske, seier ordføraren og er mest spent på om han hugsar å titulera dei kongelege gjestene på rett måte til ei kvar tid.

— Det er lett å seia du, seier han.

Etter at det offisielle programmet er over og kongeparet returnerer til skipet som ventar i Ølsfjorden er det Hans Majestets Kongens Garde sin tur til å opptre. Det skal føregå på SR-Bank Stadion Ølen.

— Folk kan bevega seg opp til stadion etter kongens avskjed, seier Vierdal.

Kostnad

I utgangspunktet er det sett av rundt 900.000 kroner til kongebesøket. Leige av utstyr utgjer den største utgiftsposten, og i tillegg kjem utgifter til sikkerheit, transport av skulebarn og andre mindre utgiftspostar.

— Me har ikkje rekna på kor mykje det blir, men når ein får besøk må ein gjera det skikkeleg, seier ordførar Vierdal.