Vanskeleg arbeid ved tunnelen

— Før sikringsarbeidet på sjølve tunnelportalen kan ta til, er det ein omfattande jobb å sikra området ved tunnelen for mannskapet som skal driva oppryddingsarbeid, skriv Statens vegvesen i ei pressemelding.

Tunnelarbeidet har drege ut. Etter raset på fredag, håpa vegvesenet å kunna opna tunnelen att i går, onsdag. Nå reknar Statens vegvesen med at tunnelen først blir opna i løpet av 9.desember.

Geologar har vore på staden og påpeika at sleppområdet der steinmassane lausna over tunnelportalen, må bli reinska og bolta. Då mannskap tok til med arbeidet i helga, viste det seg at det var ein del lausmassar også oppføre sleppområdet. Dette måtte fjernast for å tryggja arbeidet.

Nå er det omfattande bolting som skal til for å sikra tunnelen att. Austmannalitunnelen er mest utsett for snøras, og blei bygd med tanke på dette. Det er difor store steinblokkar som nå skal sikrast med stag og boltar over tunnelportalen.

— Det blei også vurdert å sprengja ned heile portalen, men dette kunna svekkja stabiliteten på rasstaden endå meir. Vegvesenet valde den sikraste løysinga, heiter det i meldinga.

Når sikringsarbeidet over tunnelen er ferdig startar oppryddinga. Då kan truleg trafikken gå som normalt att. Deretter startar arbeidet på sjølve portalen. På grunn av dette arbeidet kan vegbana bli noko innskrenka og det kan bli ventetid på strekninga.

Så lenge føre og vér tillet det, blir det organisert kolonnekøyring via gamlevegen i Austmannalia.
— Det er ei vanskeleg og krevjande om køyring, og E16 over Filefjell, riksveg 7 over Hardangervidda, eller E18 via Sørlandet kan vera alternative ruter, heiter det i pressemeldinga.