Vanskeleg å spå neste turistsesong
Om alle som har booka seg på cruiseskip med rute via Haugesund neste år kjem, kan det bli ny turistrekord i Åkrafjorden til sommaren. Lokale aktørar kryssar fingrane, men er førebudde på at koronapandemien stikk kjeppar i hjula for andre sesong på rad.
2020 skulle bli rekordåret for reiselivsaktørar som Åkrafjordtunet og Eljervik Gard. Gjennom bookingar via paraplyselskapet» Åkrafjorden Oppleving AS var Åkrafjordtunet og Eljervik Gard budd på å servere 20.000 porsjonar med lokal mat til cruiseturistar. Men omtrent samtidig som startskotet for sesongen gjekk, kom den ubodne gjesten. Korona-viruset. Resten er historie, og fasiten vart 1.000 lunsj-tallerkenar totalt.
Malurt i begeret
No handlar det om 2021. I teorien kan faktisk det bli året kor Åkrafjorden set ny rekord for besøk av cruiseturistar. For 400.000 turistar har faktisk booka plass på cruiseskipa som har rute innom Haugesund kommande år. Normalt kjem 10 prosent av dei som er på skipa på tur til Åkrafjorden for å oppleve lokal mat og fjordcruise.
