Ut på tur i Vindafjord 2024

Då var enda ein periode med Ut på tur i Vindafjord over. Ut på tur i Vindafjord er eit samarbeid mellom kommunen og frivillige eldsjeler for friluftsliv. Konseptet har fokus på friluftsliv, folkehelse og det å oppleve flotte naturomgjevnader i kvar bygd. Det er alltid ein hovudtur i kvar bygd og seks tilrettelagde turar som blir fordelt mellom bygdene i dei ulike periodane. Årets periode har vore frå 22. mars til 31. oktober.

Årets turar hadde ulike graderingar, med to krevjande hovudturar og sju middels krevjande turar. Alle dei seks tilrettelagde turane er kvar periode gradert som enkle, for dei er tilpassa rullestol og barnevogn og krev ingen spesielle ferdigheiter.

TellTur er Friluftsrådet Vest si turregistreringsteneste. På TellTur sine nettsider ligg mange turmål i medlemskommunane deira. Ved bruk av appen Norgeskart Friluftsliv kan ein enkelt registrere turen ved ankomst.

I Vindafjord er det registrert totalt 4.793 turar til dei 15 turane i kommunen i 2024. Turane er gått av 805 ulike turgåarar, og 164 av desse er busette i kommunen. Det mest besøkte turmålet er Vikaneset i Skjold, med 1.761 innsjekkingar. Kyrkjehølen i Vikedal kjem på andreplass med 712 innsjekkingar. Desse turane er dei såkalla kvardagsturane» og er forhaldsvis lette turar i nærleiken av der folk bur. Det er difor naturleg at desse er gått flest gonger. Tala for 2024 er ganske like tala frå 2023.

Årets vinnarar av eit gåvekort er turgåarane:

• Under 15 år: Elisabeth Svendsbøe og Håkon Eikesdal
• Over 15 år: Reidun Espevoll og Marit Langelandsvik
• TellTur: Marit Svendsen og Lisbeth Brekke

Gratulera til årets vinnarar!

Takk til alle bygdene og grunneigarane for eit godt samarbeid, og takk til alle turgåarar som har gått turane og vore med i trekninga. Takk for eit godt samarbeid med Friluftsrådet Vest rundt TellTur i 2024. Me ser fram til Ut på tur i Vindafjord 2025.

Norunn Helland

Rådgivar kultur og idrett, Vindafjord kommune