Usikre tal viser koronaeffekt for jordbruket

Budsjettnemnda for jordbruket la fredag fram resultat og prognose for inntektsutviklinga i jordbruket som grunnlag for årets jordbruksforhandlingar.

Sjølv om tala viser eit økonomisk koronaoppsving i 2020, reduserer ikkje det alvoret i den økonomiske situasjonen i landbruket, seier Lars Petter Bartnes i Norges Bondelag.

– Tal for 2020 speglar at det er balanse i fleire marknader samtidig som bortfallet av grensehandelen har gitt auka marknadsmoglegheiter. Det er positivt. Det endrar ikkje det faktumet at svak inntektsutvikling i dei førre åra har gitt ein tøff økonomisk situasjon for fleirtalet av bøndene. Det tek vi med oss inn mot årets jordbruksoppgjer, seier Bartnes.

Meir usikkert utgangspunkt

Grunnlagstala viser at inntektsutviklinga i jordbruket var tilnærma flat i perioden 2015 til 2019. Frå 2019 til 2020 viser tala ein gjennomsnittleg inntektsvekst på 60.400 kroner per årsverk.

Budsjettnemnda understrekar at fleire forhold, som tørken i 2018 og koronapandemien i 2020 og 2021, bidreg til meir usikre tal enn tidlegare.

– Vi vil halde fram med å produsere mat på norske ressursar, der jorda ligg, og auke norskdelen. Skal vi få til det, må vi ha ei inntektsutvikling framover som gjer det meir lønnsamt å drive. Med den inntektsutviklinga bøndene har hatt frå 2015, har avstanden i kroner til andre grupper i samfunnet auka, og det gir høge forventningar i organisasjonen. Årets oppgjer må bidra til å gi bøndene eit kraftig inntektsløft, seier Bartnes.

– Årets talmateriale viser klarare enn nokon gong før at det no må etablerast ei politisk forståing for at utjamning må til, elles blir alt pratet om å redde dei små og mellomstore bruka og landbruk over heile landet, berre tomme ord, seier Kjersti Hoff, leiar av Norsk Bonde- og Småbrukarlag.