Tysk påsketradisjon gir fargerik påskeglede

Å male påskeegg er ein gamal tradisjon med røter langt tilbake i tid. Tradisjonen går ut på å tømma egga for innhald før ein gjer seg i kast med å dekorera egga med fargerike symbol. I mange land i Europa, og særs i Aust-Europa, er dekorering av påskeegg ein stor del av påskefeiringa. Her til lands kom skikken frå Tyskland og Danmark på slutten av 1800-talet.

For tyske Vanessa Bergmann er maling av påskeegg ein vanleg aktivitet før påske, og ein kjær tradisjon ho har tatt med seg frå heimlandet.

— Eg dekorerer alltid egg til påske, seier Vanessa og viser fram ein fargerik påskebukett med vakkert dekorerte egg festa til tynne bjørkekvister.