Trygt å kjøpe flyfoto – politiet stadfestar at seljar var reell

I ei melding på Politiloggen søndag kveld opplyste operasjonsleiar Helen Rygg Ims at politiet hadde gjort undersøkingar etter melding om ein mann som hadde oppsøkt bustader for å selje flyfoto. Politiet skreiv då at mannen ikkje var tilsett i firmaet han oppgav å representere.

– Dette til informasjon dersom han skulle kome på døra dykkar, stod det i meldinga frå operasjonsleiaren.

Måndag føremiddag blei meldinga fjerna frå Politiloggen, og Grannar har vore i kontakt med både politiet og mannen det gjeld.