Tre aktørar skapar krøll

Kolumbus, Skyss og Haukeliekspressen (Tide) køyrer buss i Grannar-distriktet. Det kompliserer ting. Til dømes er det store skilnadar på billettprisane, sjølv om dei samarbeider om kven som køyrer til kva tid. Og kva selskap som er rimelegast varierer ut i frå kor langt du skal.

Har du mogelegheit til å velje ein avgang med Haukeliekspressen betalar du berre 29 kroner mellom Etne og Ølen (nettpris), medan du altså må ut med meir enn det dobbelte (65 kroner) om du vel ein Kolumbus-avgang på same distansen. Men skal du reise frå Etne til Haugesund må du betale minst 132 kroner (nettpris) med Haukeliekspressen, medan Kolumbus tar 65 kroner frå Etne og 35 frå Ølen for enkeltbillett for vaksne til Haugesund.

Går du på Skyss sine avgangar frå Etne til Ølen betalar du 47 kroner.

Etne-ordføraren etterlyser betre samordning, ikkje minst for i det heile tatt finne fram rutene.

— Mange har problem med å finne ut av busstilbodet. Mitt ønskjer er at aktørane finn fram til ei løysing som gjer at dei reisande kan ha ein plass å gå til for å finne ut når dei kan reise og til kva pris, seier ho.

Skyss er på si side i gang med å forenkle takstsystemet for Hordaland. Her er det i dag ikkje mindre enn 470 (!) takstsoner, 21 av dei berre i Etne kommune. I desember i fjor vedtok fleirtalet i Hordaland fylkestinget å redusere talet til 7 soner. Arbeidet med dette skal starte opp i år og fylkesrådmannen har fått i oppgåve å legge fram ei sak om ny sonestruktur for fylkestinget i mars.

Det nye systemet skal tre i kraft i 2018.

— Færre takstsoner vil gje billigare reiser og enklare billettsystem for reisande i heile fylket, heiter det i vedtaket.