Ingrid Liabø Hauge og Johanna Bakkevig Bjordal er nye fastlegar i Vindafjord, tilsett høvesvis i Ølen og Skjold.

To nye fast tilsette legar

Kabalen med å få full legedekning i Vindafjord ser ut til å gå opp. No er Ingrid Liabø Hauge og Johanna Bakkevig Bjordal tilsett høvesvis i Ølen og Skjold.

Publisert 16.11.2024 - 10:51 Sist oppdatert 16.11.2024 - 10:51

Kommuneoverlege Terje Kleiven opplyser at det no er tilsett to nye legar i faste stlllingar i kommunen. Begge legane byrjar 1. mars 2025.

Kleiven opplyser at dei begge er nyutdanna, men har turnusperiodane bak seg og held på med første del av spesialiseringa. Den vidare spesialiseringa vil foregå i stillingane deira i Skjold og Ølen.

Johanna Bakkevig Nagell Bjordal (27) er opphavleg frå Vikebygd. Ho budde dei første leveåra på Bjordal, men flytta til Nedstrand då ho var åtte år. No bur ho i Haugesund. Ho studerte medisin ved universitetet i Pècs, som er den femte største byen i Ungarn og har landets eldste universitet.

Bjordal skal arbeida ved Vindafjord legekontor i Skjold, og ho overtar heimelen etter Svetlana Opheim som no er sjukeheimslege i kommunen.

Ved Ølen legekontor skal Ingrid Liabø Hauge (27) overta etter Anders Bjørnestad. Ho er bergensar busett i Haugesund. Hauge tok medisinstudiet sitt i heimbyen Bergen.

Kommuneoverlegen seier at dei frå 1. mars har full legedekning i kommunen, då rett nok framleis noko basert på bruk av vikarar.

Det er spesielt stillinga etter Niels Sebastian Stuhr ved legekontoret i Vikedal som nå har fokus. Her er det søkarar, så han håpar at dei snart kan informera om endå ein lege i fast stilling. Fram til det er Arseni Neshat tilsett som vikar.