Tjuvstarta på 17. mai-festen
Fleire skular og barnehagar i distriktet har i år valt å starta 17.mai-feiringa på førehand. I Ølen gjekk rundt 160 elevar i tog til omsorgssenteret.
Det er tysdag og seks dagar til nasjonaldagen, og første til og med sjuande klase ved Ølen skule stiller seg opp og er klare til avmarsj. Målet er Ølen omsorgssenter.
Sidan det ikkje er folke- og barnedag på årets 17.mai, eller lite tradisjonell fest grunna koronarestriksjonar, fann lærarane ut at dei skulle ta litt av feiringa på førehand. Utstyrt med kvar sitt flagg, sjølvlaga faner, heiarop, musikk og song marsjerte dei 160 elevane frå skulen, gjennom Sjoargata, opp på E134, forbi rådhuset og til Ølen omsorgssenter.
Her tok fjerdeklasselærar Anne Grethe Djuve regien og starta det store skulekoret. Norge i Rødt, Hvitt og Blått og andre kjente songar frå 17. mai ljoma over plassen framfor omsorgssenteret der både tilsette og bebuarar kom til vindauga og verandaar for få med seg det fargerike og flotte opptrinnet.
